قوستانايلىق «تۇيمەقىز» سۇلۋلىق كونكۋرسىندا ەكىنشى ورىن الدى

«Miss Virtual Kazakhstan-2018» كونكۋرسىنىڭ جەڭىمپازدارى بۇگىن بەلگىلى بولدى. فينالعا شىققان بەس ارۋدىڭ قاتارىندا قوستانايلىق تۇرسىناي قابىل دا بولدى.

«بۇل بايقاۋعا ءار وبلىستىڭ سۇلۋلارى قاتىستى. عالامتور ارقىلى داۋىس بەرگەن بارشا قازاقستاندىقتار مەنىڭ ەكىنشى ۆيتسە- ميسس اتانۋىما سەپتىگىن تيگىزدى. قۋانىشىمدا شەك جوق. ايتا كەتەيىن، «Miss Virtual Kazakhstan-2018» بايقاۋىنىڭ باستاپقى كەزەڭىندە 3000 ارۋ تىركەلدى. سولاردىڭ ىشىنەن ىرىكتەلگەندەردىڭ اراسىندا بولۋىمنىڭ ءوزى مەن ءۇشىن جەتىستىك ەدى» ، - دەپ ءبولىستى ءوز قۋانىشىن ت. قابىل.

سپورتسۇيەر قاۋىمعا جاقسى تانىس، تۇرسىناي قابىلدىڭ پاراليمپيادالىق پاۋەرليفتينگتەن حالىقارالىق دارەجەدەگى سپورت شەبەرى دەگەن اتاعى دا بار. ونىڭ ايتۋىنشا، وزىنە ماقسات قويعان ادام تىنباي ەڭبەكتەنسە، الىنباس قامال جوق.

«ءومىردىڭ ءوزى سىننان تۇرادى عوي. مەن قيىندىقتاردان قورىقپايمىن. سۇلۋلىق بايقاۋىنا قاتىسپاس بۇرىن كوپ ويلاندىم. راسىندا، مەن كىمنەن كەممىن؟ ءوزىمدى قوعامنىڭ ءبىر بولشەگى رەتىندە كورسەتكىم كەلدى. ەندىگى ارمانىم - ءومىر تۋرالى كىتاپ جازۋ جانە مۇگەدەكتەرگە ارناپ سپورت زالىن اشۋ. بولاشاقتا سپورت جاتتىقتىرۋشىسى بولعىم كەلەدى» ، - دەيدى قوستانايلىق «تۇيمەقىز» .

سونىمەن، «Miss Virtual Kazakhstan-2018» كونكۋرسىندا اتىراۋ قالاسىنان قاتىسقان ايزادا جولماعامبەتوۆا جەڭىسكە جەتتى. وعان باستى سىيلىق - اۆتوكولىك تابىس ەتىلدى. ال ەكىنشى ۆيتسە- ميسس تۇرسىنايعا 300 مىڭ تەڭگەنىڭ سەرتيفيكاتى تاپسىرىلدى.