پەرزەنتحانادان بالانى ءسان- سالتاناتپەن شىعارۋعا تىيىم سالدى
استانا. قازاقپارات - وزبەكستاننىڭ دەنساۋلىق ساقتاۋ مينيسترلىگى نارەستەنىڭ جارىق دۇنيەگە كەلۋىن ءسان- سالتاناتپەن اتاپ ءوتۋ بالانىڭ دا، ونىڭ اناسىنىڭ دا دەنساۋلىعىنا كەرى اسەرىن تيگىزەتىندىگىن ايتۋدا، دەپ حابارلايدى قازاقپارات.
«بالانىڭ جارىق دۇنيەگە كەلۋى ءاربىر وتباسى ءۇشىن ۇلكەن باقىت. بۇل وقيعانى وتباسىلار ءارقالاي اتاپ ءوتىپ جاتادى. ولاردىڭ كەيبىرى پەرزەنتحانا ءۇيىنىڭ الدىنان دا باستالادى. ارينە، ءسابيدىڭ دۇنيەگە كەلۋى جانە ونىڭ ۇيىنە شىعۋىن اتاپ ءوتۋ ەرەكشە وقيعا ەكەندىگى ءسوزسىز. الايدا، مۇنى ءسان- سالتاناتقا اينالدىرىپ، قورشاعان ورتانىڭ نازارىن اۋدارتىپ، ولاردىڭ تىنىشتىعىن بۇزىپ جاتسا نە بولماق؟ ەڭ جامانى بۇل شارالار انا مەن جاڭا تۋعان ءسابيدىڭ دەنساۋلىعىنا تەرىس اسەرىن تيگىزىپ جاتسا نە بولماق» ، - دەپ اتاپ وتىلگەن وزبەكستان دەنساۋلىق ساقتاۋ مينيسترلىگىنىڭ باسپا ءسوز قىزمەتى تاراتقان اقپاراتتا.
وسىعان وراي وزبەكستان دەنساۋلىق ساقتاۋ مينيسترلىگى بالا دۇنيەگە كەلگەن كەزدە اسىرا ءسان- سالتاناتىمەن ەرەكشەلەنەتىن داستۇرلەر مەن جورالعىلاردىڭ الدىن الۋ ماقساتىندا ارنايى ءىس- شارالار جوسپارىن ازىرلەگەن.
«مەملەكەت باسشىسى اتاپ وتكەندەي، ۇيلەنۋ تويىن نەمەسە باسقا دا شارالاردى وتكىزۋ - بۇل جەكە باستىڭ عانا ءىسى ەمەس، ول الەۋمەتكە جانە بارلىق قوعامعا دا قاتىستى. مۇنداي شارالار وتباسىلىق سانالعانىمەن بۇكىل قوعامعا، ادامداردىڭ ومىرىنە دە اسەرىن تيگىزەدى. اقپان ايىندا سايكەسىنشە مينيسترلىكتەرمەن، ۆەدومستۆولارمەن جانە ۇيىمدارمەن ىنتىماقتاستىقتا بالا دۇنيەگە كەلۋىنە وراي ءسان- سالتاناتى كەلىسكەن شارالاردىڭ الدىن الۋ جونىندەگى ءىس- شارالار جوسپارى بەكىتىلدى. مەديتسينا قىزمەتكەرلەرى جاڭا ادىستەر نەگىزىندە ازاماتتارمەن سۇحباتتاسىپ، اعارتۋشىلىق جانە ءتۇسىندىرۋ جۇمىستارىن جۇرگىزەتىن بولادى. ءتۇسىندىرۋ جۇمىستارىنىڭ ەسكى ادىستەرى بۇگىندە ءوزىن ءوزى اقتاماي وتىر. سوندىقتان دا مەديتسينالىق مەكەمەلەردە اكۋشەر- گينەكولوگتارمەن، وتباسىلىق دارىگەرلەرمەن، مەدبيكەلەرمەن تىعىز ىنتىماقتاستىقتامىز. جۇكتى ايەلدەرمەن، ەنەلەرىمەن جەكە سويلەسۋدەمىز. ءبىز مەديتسينالىق تۇرعىدا بالا دۇنيەگە كەلگەن كەزدەگى ءسان- سالتاناتتى شارالار بالانىڭ دا، ونىڭ اناسىنىڭ دا دەنساۋلىعىنا تەرىس اسەر ەتەتىندىگىن تۇسىندىرۋگە تىرىسامىز» ، - دەدى وزبەكستان دەنساۋلىق ساقتاۋ ءمينيسترى اليشەر شادمانوۆ.
