كونە «اباي» جۋرنالىنىڭ جوعالعان سانى تابىلدى
بۇل تۋرالى وبلىستىق پۋشكين اتىنداعى كىتاپحانادا وتكەن اباي جۋرنالىنىڭ 100جىلدىعىنا ارنالعان ادەبي- تاريحي كەشتە ءمالىم بولدى. ءسۇيىنشى جاڭالىقتى جۋرنالدىڭ باس رەداكتورى مۇراتبەك وسپانوۆپەن بىرگەن كەلگەن ءال- فارابي اتىنداعى قازۇۋ عالىمدارى التىن اقىنبەكوۆا مەن ريزاگۇل باكەنوۆا جەتكىزدى.
«بۇعان دەيىن كەيبىر زەرتتەۋشىلەر 1918 - جىلى جۋرنالدىڭ تەك 11 سانى عانا جارىق كوردى دەگەن پىكىر ايتىپ جۇرگەن. ءبىز 12 - سانى جارىق كورگەنىنە سەندىك. ويتكەنى، مۇحتار اۋەزوۆتىڭ كەيبىر جۋرنالعا شىقتى دەگەن ماقالالارىنىڭ تىزىمدىكتە اتى بار دا، ءوزى جوق بولاتىن. سول ماقالالار سوڭعى ساننىڭ ىشىندە ەكەن» - دەيدى جۋرنالدىڭ باس رەداكتورى مۇراتبەك وسپانوۆ.
جۋرنالدىڭ جوعالعان سانىن جاس عالىم التىن اقىنبەكوۆا وتكەن جىلى الماتىداعى مۇحتار اۋەزوۆ اتىنداعى مۇراجايدان تاپقان.
«اباي» جۋرنالىن شىعارۋ ۇلى اقىننىڭ دۇنيەدەن وتكەنىنە 10 جىل تولۋىنا بايلانىستى سەمەي قالاسىندا وتكەن باسقوسۋدا قولعا الىنعان. ءبىراق ازاماتتىق سوعىستىڭ باستالىپ كەتۋىنە بايلانىستى بىرنەشە جىل كەشىگىپ بارىپ ىسكە اسادى. باستاپقىدا جۋرنال ايىنا ەكى رەت شىعادى دەپ كوزدەلگەنىمەن، تەك اقپان ايىندا عانا بۇل جوسپار ىسكە اسادى. قالعان ۋاقىتتا ايىنا ءبىر رەتتەن شىعىپ وتىرادى. سوڭعى تابىلعان 12 ءنومىرى قارجى تاپشىلىعى سەبەبىنەن ءبىرىڭعاي سارى قاعازعا باسىلعان»، - دەيدى التىن اقىنبەكوۆا.
اتالمىش جۋرنالدىڭ جارىق كورۋىنە مۇرىندىق بولعان جۇسىپبەك ايماۋىتوۆ پەن مۇحتار اۋەزوۆ بولعان. قوس ءدۇلدىل سول كەزدە «ەكەۋ» دەگەن اتپەن ۇزبەي ماقالا جازىپ وتىرعان. ءار سان ابايدىڭ عاقليا سوزدەرىمەن باستالعان. جۋرنال تاۋەلسىزدىك العان سوڭ قايتا جارىق كورە باستادى. باسىلىمنىڭ قايتا جارىق كورۋىنە الاشوردانىڭ سوڭعى تۇياعى قايىم مۇحامەدحانوۆ سەبەپكەر بولدى. شارا بارىسىندا قايىم مۇحامەتحانوۆ اتىنداعى ءبىلىم مەن مادەنيەت ورتالىعىنىڭ ديرەكتورى دينا قايىم قىزى ونلاين بايلانىسقا شىعىپ، اكەسىنىڭ ءىزى قالعان جۋرنالدىڭ مەرەيتويىمەن قۇتتىقتاپ، وي ءبولىستى.
ادەبي- تاريحي كەشتى ۇيىمداستىرعان كىتاپحانا قىزمەتكەرلەرى جينالعان جۇرتتى «ءبىزدىڭ اباي» ەلەكتروندى كىتاپحاناسىنداعى «اباي» جۋرنالىنىڭ 1992 -جىلدان بەرى شىققان بارلىق سانىنىڭ ەلەكتروندى نۇسقاسىمەن تانىستىردى.
اۆتور: ەسىمجان ناقتىباي
