گۇلميرا يسيمبايەۆا سۇراققا جاۋاپ بەرە الماعان شەنەۋنىككە ەسكەرتۋ جاسادى

استانا. قازاقپارات - ق ر پارلامەنتى ءماجىلىسى ءتوراعاسىنىڭ ورىنباسارى گۇلميرا يسيمبايەۆا سۇراققا جاۋاپ بەرە الماعان ايەروعارىش كوميتەتىنىڭ وكىلىنە ەسكەرتۋ جاسادى، دەپ حابارلايدى قازاقپارات.

بۇگىن ماجىلىستەگى ۇكىمەت ساعاتى بارىسىندا دەپۋتات جامبىل احمەتبەكوۆ قورعانىس جانە ايەروعارىش ونەركاسىبى مينيسترلىگى وكىلىنە ساۋال قويعان بولاتىن.

 ءوز كەزەگىندە ايەروعارىش كوميتەتى ءتوراعاسى ورىنباسارىنىڭ مىندەتىن اتقارۋشىسى باۋبەك ورالماعامبەتوۆ سۇراعىنا حات تۇرىندە جاۋاپ بەرۋ ۇسىنىسىن ايتتى.

 «مەن ايەروعارىش كوميتەتى وكىلىمىن. سوندىقتان دا دەپۋتاتتىڭ بەرگەن ساۋالىنا مينيسترلىك اتىنان حات تۇرىندە جاۋاپ بەرۋگە نيەتتىمىز»، - دەدى ب. ورالماعامبەتوۆ.

وسى ورايدا ءماجىلىسى ءتوراعاسىنىڭ ورىنباسارى گۇلميرا يسيمبايەۆا اتالعان مينيسترلىك وكىلدەرىنە ەسكەرتۋىن ايتتى.

 «ۇكىمەت ساعاتىنا قۇزىرەتتى وكىل عانا شاقىرىلۋى ءتيىستى ەدى. ءسىز بۇگىنگى تاقىرىپتىڭ مامانى ەمەسپىن، ساۋال قۇزىرەتىڭىزگە كىرمەيتىنىن ايتتىڭىز، سولاي ما؟ سوندىقتان باۋبەك جەتكەرگەن ۇلى، ءسىزدىڭ ۋاقىتىڭىزدى المايىق. بۇل جەردە 2-3 ساعات پارلامەنتتە وتىرىپ كەتۋ ماقسات ەمەس. بىزگە مۇنداي تاقىرىپ بويىنشا مۇددەلى، سۇراقتارعا جاۋاپ بەرە الاتىن، پىكىر ايتا الاتىن ماماندار قاجەت. ال ءسىز نەگىزگى جۇمىسىڭىزبەن اينالىسا بەرىڭىز»، - دەدى گۇلميرا يسيمبايەۆا ايەروعارىش كوميتەتى وكىلىنە قاراتا ايتقان سوزىندە.

اۆتور: رۋسلان عابباسوۆ