قازاقستاندا ونەرتانۋ عىلىمى جوق - كومپوزيتورلار وداعىنىڭ ءتورايىمى

استانا. قازاقپارات - قازاقستاندا ونەرتانۋ عىلىمى جوق. پەتروپاۆلدا وتكەن ءانشى، سازگەر، اقىن، سەگىز سەرى اتانعان مۇحامەدقاناپيا شاقشاقوۆتىڭ 200 جىلدىعىنا ارنالعان رەسپۋبليكالىق عىلىمي كونفەرەنتسيادا قازاقستان كومپوزيتورلار وداعىنىڭ ءتورايىمى بالنۇر قىدىربەك وسىلاي دەدى، دەپ حابارلايدى قازاقپارات «حابار 24» تەلەارناسىنا سىلتەمە جاساپ.

«رۋحاني جاڭعىرۋ» باعدارلاماسى اياسىندا بۇل شاراعا ەلىمىزدىڭ تۇكپىر-تۇكپىرىنەن زيالى قاۋىم وكىلدەرى قاتىسىپ، تۇلعانىڭ سان قىرلى شىعارماشىلىق مۇراسى مەن ءومىر جولى تۋرالى زەرتتەۋلەرىن ورتاعا سالدى.

ايتا كەتۋ قاجەت، بۇگىنگى كۇنى سەگىز سەرىنىڭ كوپتەگەن اندەرىنىڭ تەك 16 سى عانا ونىڭ تۋىندىسى رەتىندە دالەلدەنگەن.

«بىزدە مۋزىكا، ونەرتانۋ عىلىمى كەنجەلەپ قالدى دەۋگە دە كەلمەيدى. بىزدە قازىر ونەرتانۋ عىلىمى جوق. ادەبيەت تانۋ بولعان سوڭ، ادەبيەت تاراپىنان سەگىز سەرىنىڭ شىعارمالارى قارالىپ جاتىر، زەرتتەلىپ جاتىر. ال مۋزىكاعا بايلانىستى ايتارىم، بىزدە سەگىز سەرىنىڭ شىعارماشىلىعىن زەرتتەپ جاتقان ادام جوق»، - دەدى قازاقستان كومپوزيتورلار وداعىنىڭ ءتورايىمى بالنۇر قىدىربەك.