كايردە ناۋرىز مەرەكەسى تويلاندى
بۇل تۋرالى ەلشىلىكتىڭ فەيسبۋكتەگى پاراقشاسىندا حابارلاندى، دەپ حابارلايدى قازاقپارات.
«ءىس- شارانىڭ اشىلۋ سالتاناتىندا ءسوز سويلەگەن ەلشى ا. يساعاليەۆ جۇرتشىلىقتى ناۋرىزبەن قۇتتىقتاپ، بۇل مەرەكەنىڭ ەجەلدەن كەلە جاتقان ەلىمىزدىڭ رۋحاني بايلىعى ەكەنىن، كوپتەگەن حالىقتاردىڭ مەيرامى رەتىندە يۋنەسكو ادامزاتتىڭ ماتەريالدىق ەمەس مۇرالارى تىزىمىنە ەنگەنىن اتاپ ءوتتى. سونىمەن قاتار، ول ەلىمىزگە دامۋ مەن گۇلدەنۋ، بارشاعا باق- بەرەكە، ال ستۋدەنتتەر قاۋىمىنا جوعارى ءبىلىم الىپ، ەلگە تابىسپەن ورالۋلارىن تىلەدى» دەپ جازىلعان حابارلامادا.
سونداي- اق، ەلشىلىك كەلتىرگەن مالىمەتكە سايكەس، مەرەكەلىك ءىس- شارا ونەرپاز ستۋدەنتتەردىڭ كونسەرتتىك قويىلىمدارىمەن جالعاسقان. قازاقتىڭ ءانىن، كۇيىن جاستار جارىسا شىرقاپ، ساحنالىق قويىلىمدار كورسەتىلگەن. ۇلتتىق سپورت ويىندارى دا تاسادا قالماي، گىر كوتەرۋ، قول كۇرەسى، ارقان تارتۋ سياقتى سپورت تۇرلەرىنەن بىلەكتى جىگىتتەر كۇش سىناستى.
«سونىمەن قاتار، ناۋرىز كوجەدەن باستاپ ءتۇرلى قازاقتىڭ ءدامدى تاعامدارى دايىندالىپ، ۇلكەن داستارحان جايىلدى. جالپى العاندا، قازاقستاندىقتار «ءنىل» جەرىندە ءبىر جاعادان باس، ءبىر جەڭنەن قول شىعارىپ، ەلدىگىمىزدىڭ ەرەكشەلىگىن كورسەتە ءبىلدى» دەلىنگەن حابارلامادا.
