رەسەيدە پرەزيدەنت سايلاۋى ءوتىپ جاتىر

رەسەيدەگى سايلاۋ زاڭناماسى بويىنشا ەل پرەزيدەنتىن سايلاۋ جەرگىلىكتى ۋاقىتپەن ساعات 08:00-دەن 20:00 ارالىعىندا جۇرگىزىلەدى. ءدال وسى كۇنى سايلاۋشىلار ءۇشىن بۇكىل رەسەي ىشىندە 97 مىڭعا جۋىق سايلاۋ ۋچاسكەلەرى جۇمىس اتقاراتىن بولادى.

ر ف تەرريتورياسى 11 ساعاتتىق بەلدەۋدى الىپ جاتقانىن ەسكەرسەك، ەلدىڭ قيىر شىعىسىندا ورنالاسقان كامچاتكا ايماعى مەن چۋكوتكا اۆتونومدى وكرۋگىنىڭ تۇرعىندارى داۋىس بەرۋدى رەسەيدىڭ ورتالىق جانە باتىس بولىگىندە سەنبى كۇنگى كەشكى 23:00 بولىپ جاتقاندا- اق باستاپ كەتكەن. سايكەسىنشە، پرەزيدەنت سايلاۋىندا داۋىس بەرۋ ەلدىڭ ەڭ باتىس نۇكتەسىندە ورنالاسقان كالينينگراد قالاسىنداعى سايلاۋ ۋچاسكەلەرى جابىلعاندا توقتاتىلماق. الايدا، باتىس ەلدەرىندە جۇرگەن ر ف ازاماتتارى ءۇشىن داۋىس بەرۋ جەرگىلىكتى ۋاقىت بويىنشا 20:00-گە دەيىن جالعاسا بەرمەك.

بارلىق رەسەيلىكتەر تەك سايلاۋ ۋچاسكەسىنە كەلىپ داۋىس بەرە الادى. سايلاۋ كۇنى وربيتادا جۇرگەن رەسەيلىك عارىشكەرلەر عانا ۇشۋ ساپارلارىن باسقارۋ ورتالىعىمەن بايلانىسۋ ارقىلى ارنايى تەلەسەانس كەزىندە سەنىمدى وكىل ارقىلى داۋىس بەرە الادى. ءدال بۇگىن ۇشۋ ساپارلارىن باسقارۋ ورتالىعى حالىقارالىق عارىش ستانسياسىندا بورتينجەنەر انتون شكاپلەروۆتىڭ داۋىس بەرۋىن جۇزەگە اسىرادى.

رەسمي مالىمەتتەرگە سايكەس، پرەزيدەنت سايلاۋى كەزىندە ناۋقاننىڭ تىنىش وتۋىنە بارلىق كۇش قۇرىلىمدارىن قوسا ەسەپتەگەندە 532 مىڭ ادام مەن 110 مىڭ ارنايى تەحنيكا جۇمىلدىرىلماق.

2018 -جىلدىڭ 1 - قاڭتارىنداعى مالىمەتتەرگە سايكەس، ورتالىق سايلاۋ كوميتەتى داۋىس بەرۋگە قۇقىلى 110 ميلليون 858 مىڭ 228 سايلاۋشىنىڭ بارىن جاريالاعان. ولاردىڭ 108 ميلليون 968 مىڭ 869-ى رەسەيدە، 1 ميلليون 889 مىڭ 359 ادام شەتەلدە داۋىس بەرە الادى. ايتا كەتەرلىگى، 2012 -جىلعى سوڭعى پرەزيدەنت سايلاۋىندا 109 ميلليون 860 مىڭ 331 سايلاۋشى تىركەلگەن بولاتىن.

ر ف س ءى م رەسمي وكىلى ماريا زاحاروۆانىڭ حابارلاۋىنشا، الەمنىڭ 145 ەلىندەگى 378 ۋچاسكەدە رەسەيلىك ازاماتتار سايلاۋعا قاتىسا الادى.

مەملەكەتتىڭ پرەزيدەنتتىگىنە: ل د پ ر كوشباسشىسى ۆلاديمير جيرينوۆسكي، ك پ ر ف اتىنان بيزنەسمەن پاۆەل گرۋدينين، «گراجدانسكايا ينيتسياتيۆا» پارتياسىنىڭ تەلەجۇرگىزۋشىسى كسەنيا سوبچاك، «يابلوكو» پارتياسىنىڭ نەگىزىن قالاۋشى گريگوري ياۆلينسكي، بيزنەس- ومبۋدسمەن، روست پارتياسىنىڭ ءتوراعاسى بوريس تيتوۆ، «كوممۋنيستى روسسيي» پارتياسىنىڭ اتىنان ماكسيم سۋرايكين، «روسسييسكيي وبشەنارودنىي سويۋز» پارتياسىنىڭ كوشباسشىسى سەرگەي بابۋرين، سونىمەن قاتار، قازىرگى پرەزيدەنت ۆلاديمير پۋتين ءتۇسىپ جاتىر. پۋتيندى «ەدينايا روسسيا»، «سپراۆەدليۆايا روسسيا»، «رودينا»، «پاتريوتى روسسي» پارتيالارى مەن قوعامدىق ۇيىمدار قولداپ وتىر.

ايتا كەتسەك، 2012 - جىلعا دەيىن رەسەيدە پرەزيدەنت 4 جىلدا ءبىر سايلانعان بولاتىن. 2008 -جىلى كونستيتۋتسياعا وزگەرىستەر ەنگىزىلگەن سوڭ ونداعى پرەزيدەنت 6 جىلدا ءبىر سايلانادى. رەسەي پرەزيدەنتتىگىنە جاسى 35-تەن جوعارى، ەلدە 10 جىلدان استام ۋاقىت تۇرعان ادام سايلانا الادى.

اۆتور: ايان بەكەن ۇلى