ماسكەۋدە باقىت قايىربەكوۆتىڭ شىعارماشىلىق كەشى ءوتتى
سالتاناتتى جيىن كەزىندە قالامگەردىڭ «كوپ نۇكتە» اتتى جاڭا كىتابى كوپشىلىككە تانىستىرىلىپ، «ناۋرىز» مەيرامى جايلى دەرەكتى فيلمى كورسەتىلدى.
اقىن، اۋدارماشى، رەجيسسەر - باقىت قايىربەكوۆ 65 جاستا. ول ءوزىنىڭ مەرەيتويىن بۇعان دەيىن الماتىدا وتكىزسە، ەندى مىنە ماسكەۋ جۇرتشىلىعىمەن قاۋىشىپ وتىر. رەسەي استاناسىنداعى 2 بىردەي جوعارى وقۋ ورنىن ءتامامداعان قازاق اقىنى، وسىلايشا كورشى ەلدەگى وقىرماندارىنا دا شىعارماشىلىق ەسەپ بەردى.
سالتاناتتى كەش بارىسىندا باقىت قايىربەكوۆ ءوزىنىڭ ولەڭدەرىن وقىپ، دەرەكتى فيلمدەرىن كوپشىلىككە كورسەتتى. پوەزيادا جانە كينەماتوگرافيا سالاسىندا دا وزىندىك قولتاڭباسى بار قالامگەردىڭ كەز كەلگەن ەڭبەگىندە، قازاقتىڭ ءيىسى، ۇلتتىڭ ءۇنى جاتىر.
شىعارماشىلىق كەشكە باقىت قايىربەكوۆتىڭ قالامداس دوستارى مەن ادەبيەتشىلەر، زيالى قاۋىم وكىلدەرى مەن قازاق ديپلوماتتارى جانە ماسكەۋدە تۇراتىن قانداستارىمىز مولىنان جيىلدى. وسىلايشا، قازاقتىڭ ادەبيەتى مەن مادەنيەتى الىپ شاھارداعى سان الۋان جۇرتتىڭ باسىن قوستى.
«كورىسۋ، امال دەگەن كەرەمەت كۇنىمىز بار، سونىمەن قۇتتىقتايمىن! كورىسۋ دەگەن قانداي كەرەمەت - قىستان شىقتىق، امان قالدىق. ولەڭ سياقتى ءوزىمىزدىڭ تاعدىرىمىزدى، ءومىرىمىزدى ءبىلۋ كەرەك، ءتۇسىنۋ كەرەك، ماعىناسىن كوتەرۋ كەرەك»، - دەدى كەش بارىسىندا باقىت قايىربەكوۆ.
ەۋرازيالىق تەلەۆيدەنيە جانە راديو اكادەمياسىنىڭ پرەزيدەنتى ۆالەري رۋزيننىڭ ايتۋىنشا، باقىت قايىربەكوۆ - كلاسسيك اقىن. «ول قازاق مادەنيەتىنىڭ كەڭىستىگىن كەڭەيتۋگە اتسالىسىپ، ءوزىنىڭ اقىندىق جانە كينو شىعارماشىلىعىندا كەرەمەت دۇنيەلەر جاساپ ءجۇر. ونىڭ تۋىندىلارىنان قازاق ءداستۇرى مەن مادەنيەتىن ماحابباتپەن، تەرەڭ بىلىممەن كورسەتكەنىن بايقايمىز».
