قىرعىز تەلەۆيزياسىنىڭ ارداگەرلەرى تاريحي ەستەلىكتەرمەن ءبولىستى

استانا. قازاقپارات - تەلەۆيزيا بىزگە جاڭا الەم اشىپ، ونىڭ جۇرتقا اسەرى ادامنىڭ عارىشقا تۇڭعىش ۇشۋىمەن بىردەي بولدى. قازاقستاندىق ارىپتەستەرىمەن ءبىر مەزگىلدە جۇمىسىن باستاعان قىرعىز تەليەۆيزياسىنىڭ ارداگەرلەرى وسىلاي دەيدى.

 وسىدان 60 جىل بۇرىن جاڭا ماماندىقتى يگەرۋدە دە ۇقساس قيىندىقتاردى باستان كەشىرگەن. 1958 -جىلدىڭ جەلتوقسان ايىندا، سول كەزدە فرۋنزە اتالعان قىرعىزستان استاناسىندا تۇڭعىش تەلەستۋديا پايدا بولدى. ءىس جاڭا قولعا الىنىپ جاتقان شاقتا شىعارماشىلىق ۇجىمىمەن قاتار بىلىكتى تەحنيكالىق ماماندار دا قاجەت ەدى.

وپەراتورلار مەن رەجيسسەرلەردىڭ كوبىسى ماسكەۋگە، لەنينگرادقا، الماتى مەن تاشكەنتكە بارىپ، تاعىلىمدامادان وتەتىن. ەسەسىنە جاڭا ماماندىقتاردى يگەرە باستاعان كورشى رەسپۋبليكالار تاجىريبەسىمەن بولىسۋدەن ايانىپ قالمادى.

تامارا جامانبايەۆا، قىرعىز تەليەۆيزياسىنىڭ ديكتورى:

- قىرعىز تەلەۆيزياسى 1958 -جىلدىڭ جەلتوقسان ايىندا حابار تاراتا باستاعان. وسىعان دەيىن الماتى مەن تاشكەنتتە تەلەۆيزيا قۇرىلعان بولاتىن. ولاردا رەسپۋبليكالىق دارەجەدەگى تەلەورتالىق بولىپ جوبالانسا، بەلگىسىز سەبەپپەن بىزدە وبلىس دارەجەسىندەگى تەلەورتالىق بولىپ سالىندى. سوندىقتان عيماراتىمىز ەداۋىر كىشى بولىپ شىقتى.

 الماتى مەن تاشكەنتكە تاجىريبە الماسۋ ءۇشىن العاش بولىپ فرۋنزە تەلەستۋدياسىنىڭ وپەراتورلارى بارىپ قايتقان. سول كەزدە ستۋدياداعى كامەرانىڭ سالماعى ءبىر توننا بولعان، كورىنىستەردى اۋىستىرۋ ءۇشىن زالدا دەنەلى تەحنيكتەر كەزەكشىلىكتە جۇرگەن. ديكتورلار بولسا قازىرگى كەزدە كەڭىنەن پايدالانىپ جۇرگەن تەلەسۋفلەردى ءتىپتى ارماندامايتىن ەدى. قاعازعا قاراپ وقيتىن، ال كەيدە ءبارىن جاتتاۋعا تۋرا كەلەتىن. الايدا وسى قيىندىقتاردى ەشكىم ەلەمەيتىن دە.

 ولجوباي توكتوسۋنوۆ، تەلەجۋرناليست:

 - پلەنكا جەتىسپەيتىن. سول كەزدەگى كامەرالار مۇلدەم وزگەشە بولدى. 12 مەتر پلەنكا بەرەتىن، بۇل 10-12 مينۋت تۇسىرۋگە جەتەتىن. سوعان دا جاقسى كادرلار ءتۇسىرىپ، كەرەمەت سيۋجەتتەر شىعارىپ جۇردىك. جاستار تاريحىمىزدى ءبىلۋى كەرەك دەپ سانايمىن. تەك تەلەۆيزياعا قاتىسى بارلار ەمەس، ەلدىڭ ءبارى تەلەۆيزيانىڭ قالاي باستالىپ، دامىعانىن بىلۋگە ءتيىس.

بۇل جاڭالىقتار مەن دۇنيە تانۋدىڭ ءداۋىرى بولدى. تەلەۆيزيامەن بىرگە جۇرتتىڭ ۇيىنە عىلىم، مادەنيەت پەن اقپارات كەلدى. سول سەبەپتى ىرگەسىن سالعان تەلەشەبەرلەر وزدەرىن كورەرمەنگە كۇللى جاھاندى اشقان جول سالۋشى رەتىندە قابىلدايدى. قازىر ول قىزمەتتى عالامتور كورسەتىپ ءجۇر. ينتەرنەتكە شىعاتىن قۇرىلعىلار كەڭىنەن تاراسا دا، تەلەۆيزيا ءداۋىرى اياقتالۋعا جاقىن دەپ ايتۋعا بولمايدى.

 اۆتورى: باقىت چەرماشيەۆ

www.24.kz