استانادا ۇزدىك تەلەۆيزيا جۋرناليستەرى ماراپاتتالادى

بيىلعى جىلعى سالتاناتتى ءىس-شارا قازاق تەلەۆيزياسىنىڭ 60 جىلدىعىنا ارنالادى، دەپ حابارلايدى اقپارات جانە كوممۋنيكاتسيالار مينسترلىگى باسپا ءسوز قىزمەتى.

باسپا ءسوز مالىمەتتەرىنە قاراعاندا، تىلشىلەر، تەلەۆيزيا، مەملەكەت جانە قوعام قايراتكەرلەرى مەن ەسترادا جۇلدىزدارىنا قوسا سالتاناتتى كەشكە قازاق تەلەۆيزياسىنىڭ ارداگەرلەرى دە شاقىرىلدى.

اعىمداعى جىلعى بايگەگە 14 نوميناتسيا بويىنشا وتىنىمدەر قابىلداۋ 15-قاڭتار مەن 1-ناۋرىز ارالىعىندا جۇرگىزىلدى. ولاردىڭ ىشىندە قازاق تەلەۆيزياسىنىڭ 60  جىلدىعى مەن استانانىڭ 20 جىلدىعىنا ارنالعان ەرەكشە نوميناتسيالار بار. سونىمەن قاتار «ۇزدىك وپەراتورلىق جۇمىس»، «جىلدىڭ ۇزدىك تەلەجۇرگىزۋشىسى»، «جىلدىڭ ۇزدىك تەلەجۋرناليسى»، «ۇزدىك رەجيسسەرلىك جۇمىس» جەكە نوميناتسيالارى دا بار.

«تۇمارعا» وتىنىمدەردى قابىلداۋ تولىعىمەن اۆتوماتتاندىرىلىپ، kaztube.kz پورتالىنىڭ نەگىزىندە جۇزەگە اسىرىلعان بولاتىن. بايگەگە قاتىسۋشىلاردىڭ جوعارى بەلسەندىلىكتەرىن اتاپ ءوتۋ كەرەك. وتىنىمدەردى قابىلداۋ كەزەڭىندە kaztube.kz پورتالىنا كىرۋشىلەر سانى %80  عا ءوستى، ال وتىنىمدەر سانى بىلتىرعى كورسەتكىشكە قاراعاندا 1,6 ەسەگە ارتتى (240 ءوتىنىم) .

2018-جىلى «تۇمارعا» 397 كونكۋرستىق جۇمىس كەلىپ ءتۇستى. ولاردىڭ ىشىندە قازىلار القاسى بايگە ەرەجەسىنىڭ تالاپتارىنا سايكەس رەسىمدەلگەن 355 كونكۋرستىق ءوتىنىمدى قاراۋ ءۇشىن قابىلدادى.

وڭىرلىك تۇرعىدا اقتوبە، الماتى، قاراعاندى، باتىس جانە شىعىس قازاقستان وبلىستارىنىڭ تەلەارنالارى كوبىرەك بەلسەندىلىك تانىتتى.

نومينانتتار اراسىنان ەڭ كوپ قابىلدانعان جۇمىستار كەلەسى نوميناتسيالاردا: «ۇزدىك دەرەكتى كينو»، «ۇزدىك اعارتۋشىلىق باعدارلاما»، «ۇزدىك الەۋمەتتىك باعدارلاما»، «ۇزدىك ويىن-ساۋىق جوباسى».

بايگەنىڭ قازىلار القاسىنا جۋرناليستيكا مەن تەلەراديو حابار تاراتۋ سالالارىنداعى كاسىبي، جوعارى بىلىكتى ساراپشىلار كىردى.

ەستەرىڭىزگە سالا كەتسەك، «تۇمار» ۇلتتىق تەلەۆيزيالىق بايگەسى قازاقستان رەسپۋبليكاسىنىڭ اقپارات جانە كوممۋنكياتسيالار مينيسترلىگى تاراپىنان ەڭ ساپالى جانە ماڭىزدى تەلەۆيزيالىق مازمۇندى تاۋىپ، دارىپتەۋ ءۇشىن، تالانتتى پروفەسسيونالداردى قولداۋ جانە وتاندىق تەلەۆيزيانىڭ ساپالىق ستاندارتتارىن ارتتىرىپ، قازاقستاندىق تەلەۆيزيانىڭ دامۋىن قامتاماسىز ەتۋ ماقساتىندا قۇرىلعان بولاتىن.

بيىلعى جىلى بايگە ەكىنشى رەت وتكىزىلۋدە.