الماتىلىق كەلىنشەكتەر گيننەس كىتابىنا ەنەتىن قۇراق كورپەنى تىگۋگە دايىندالۋدا - فوتو

الماتى. قازاقپارات - الماتىدا گيننەستىڭ رەكوردتار كىتابىنا ەنەتىن ەڭ ۇلكەن قۇراق كورپەنى تىگۋ ءۇشىن شەبەرلەر بىلىكتىلىكتەرىن شىڭداپ جاتىر، دەپ حابارلايدى قازاقپارات ءتىلشىسى.

بۇعان دەيىن حابارلاعانىمىزداي، 22 - ناۋرىز كۇنى استانا الاڭىندا 45 ايەل جالپى اۋدانى 25 مىڭ شارشى مەترلىك قۇراق كورپە تىگەتىن بولادى.

 وسىعان وراي، بۇگىن س. بەگالين اتىنداعى كىتاپحانادا العاشقى شەبەرلىك ساعاتى ءوتتى. رەكوردتى جاڭارتۋعا نيەت تانىتقان ايەلدەرگە كورپە قۇراۋدىڭ قىر- سىرى كورسەتىلدى.

شەبەرلىك ساعاتىندا كەلگەندەرگە كورپەنى قۇراۋ تەحنيكاسى ۇيرەتىلدى. ول ءۇشىن ايەلدەر وزدەرىنە قاجەتتى ماتالارى مەن جىپتەرىن الا كەلگەن.

«22 - ناۋرىزدا قۇراق كورپە قۇرايتىن ايەلدەردى ۇيرەتىپ جاتىرمىز. ول ەڭ ۇلكەن كورپە رەتىندە گيننەستىڭ رەكوردتار كىتابىنا ەنەتىن بولادى. شەبەرلىك ساعاتىنا قاتىسۋعا بارلىق ازاماتتاردى شاقىرامىز»، - دەدى شارانى ۇيىمداستىرۋشى، الماتى قالالىق كىتاپحانالار جۇيەسىنىڭ ديرەكتورى، ق ر ەڭبەك سىڭىرگەن قايراتكەرى روزا قابيەۆا.

ايتا كەتەيىك، الەمدەگى ەڭ ۇلكەن كورپەنى تىگۋ 22 - ناۋرىزدان باستالىپ، 20  - قىركۇيەك - قالا كۇنىنە تامان اياقتالادى.

بۇعان دەيىنگى ۇزىن كورپە رەكوردى 2000 -جىلى پورتۋگاليانىڭ پورتو قالاسىندا جاسالعان ەدى. وندا اۋماعى 25100  شارشى مەتر «Manta da Cultura»  كورپەسى تىگىلگەن.

 «قۇراق كورپەنىڭ ءار بولشەگى وتانىمىزدىڭ سان الۋاندىعىن: ونىڭ دالاسىن، تاۋى مەن وزەنىن كورسەتەدى. ال باستى سيمۆولى - حالىق بىرلىگى. قازاقستاندا 130-دان استام ۇلت تۇرادى. كورپەنىڭ قۇراقتارى تۇتاس جامىلعىعا اينالىپ، ەلىمىزدىڭ تۇتاستىعىن پاش ەتەدى»، - دەدى جوبانىڭ باستى ۇيىمداستىرۋشىسى الماتى قالاسى مادەنيەت جانە مۇراعاتتار باسقارماسىنىڭ وكىلدەرى.

بيىل الماتىدا ناۋرىز مەيرامى اۋقىمدى اتالىپ وتپەك. قالادا 22 - ناۋرىز- 21 - ءساۋىر ارالىعىندا 150 مادەني- سپورتتىق شارا ۇيىمداستىرىلادى.

ال ۇلىستىڭ ۇلى كۇنى باس كوشەلەردە ورنالاسقان 40 مەديابوردتان تىكەلەي ترانسلياتسيالاناتىن بولدى.

اۆتور: گۇلميرا عوسمانالي