ەلوردانىڭ كوشەسىنە پارسى اقىنى رۋداكيدىڭ ەسىمى بەرىلدى
«استانا اكىمدىگىنىڭ ونوماستيكالىق كوميسسياسىنا ق ر سىرتقى ىستەر مينيسترلىگىنەن ەلوردا كوشەلەرىنىڭ بىرىنە پارسى عالىمى ءابۋ ابداللاح رۋداكيدىڭ ەسىمىن بەرۋ تۋرالى حات ءتۇستى. بۇل ەكى مەملەكەتتىڭ (قازاقستان مەن تاجىكستان - اۆتور) دوستىق قارىم-قاتىناسىن نىعايتۋعا مۇمكىندىك بەرەدى. ايتا كەتەيىك، تاجىكستان استاناسى - دۋشانبەدە قازاقتىڭ عۇلاما ويشىلى ابايدىڭ اتىندا كوشە بار. ول - دۋشانبەنىڭ ورتالىق بولىگىندە ورنالاسقان»، - دەدى ءماسليحات سەسسياسىندا استانا قالالىق تىلدەردى دامىتۋ باسقارماسىنىڭ باسشىسى تىلەۋعالي قىشقاشبايەۆ.
ونىڭ ايتۋىنشا، ەلوردا كوشەلەرىنىڭ بىرىنە رۋداكي ەسىمىن بەرۋ استانانىڭ ونوماستيكالىق كوميسسياسى مەن ق ر ۇكىمەتى جانىنداعى رەسپۋبليكالىق ونوماستيكالىق كوميسسيانىڭ وتىرىستارىندا قارالدى.
«استانا اكىمدىگى الماتى اۋدانىندا ورنالاسقان 179№ كوشەنىڭ اتاۋىن وزگەرتۋدى ۇسىنىپ وتىر. ول - ب. مايلين كوشەسىنەن باستالىپ، ب. مومىش ۇلى كوشەسىنە دەيىن جالعاسادى. مۇندا 51№ مەكتەپ-گيمنازياسى، 6№ قالالىق ەمحانا، اكىمشىلىك عيماراتتار مەن تۇرعىن نىساندارى ورنالاسقان»، - دەدى باسقارما باسشىسى.
ءماسليحات دەپۋتاتتارى بۇل ۇسىنىستى ءبىراۋىزدان قولداپ، وسىلايشا 179№ كوشەگە ءابۋ ابداللاح رۋداكي ەسىمى بەرىلدى.
