الماتىدا جازۋشىلار وداعىنىڭ كەزەكتى قۇرىلتايى ءوتىپ جاتىر
جازۋشىلاردىڭ باستى جيىنىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ەلباسى نۇرسۇلتان نازاربايەۆتىڭ قۇتتىقتاۋىن وقىپ بەردى. جيىندا نەگىزگى بايانداما جاساعان جازۋشىلار وداعىنىڭ قازىرگى ءتوراعاسى نۇرلان ورازالين قالامگەرلەر وداعى اتقارعان جۇمىستارعا كەزەڭ-كەزەڭىمەن شولۋ جاساپ ءوتتى.
«قازاقستان جازۋشىلار وداعى كەڭەس وداعى كەزىندەگىدەي يدەولوگيالىق قۇرال ەمەس. ولاي بولۋى دا مۇمكىن ەمەس. ءبىز قۇقىقتىق قوعامدا ءومىر ءسۇرىپ جاتقان ەركىن قالامگەرلەردىڭ ەركىن بىرلەستىگىمىز. ونداعان، جۇزدەگەن قوعامدىق ۇيىمدار سياقتى ءبىز دە قوعامدىق بىرلەستىكتەردىڭ ءبىرى عانامىز. زاڭدا كورسەتىلگەن تالاپتارعا ساي جارعىمىزدا كورسەتىلگەن باپتارعا بايلانىستى ءومىر سۇرۋگە مىندەتتىمىز. بۇگىندە وداقتىڭ قۇرامىندا 780 نەن استام قالامگەر بار. ادەبيەت دەيتىن كيەلى ۇيىمعا 84 جىل يە بولعان جازۋشىلار وداعىنىڭ جۇمىسىن تۇگەل تۇگەندەۋ مۇمكىن ەمەس، ءبىز سوڭعى 5 جىلدا اتقارىلعان جۇمىستاردى ايتىپ شىقتىق. ۇيىم وداق نەگىزىن قالاعان الاش ارىستارى زامانىندا دا، ودان كەيىن مۇحتار، عابيتتەر باسشىلىق ەتكەن كەزەڭدە دە جويىلىپ كەتپەگەن. جازۋشىلار وداعىندا وتكەن 22 جىل مەن ءۇشىن ۇلكەن مەكتەپ بولدى. بارلىعىڭىزعا العىسىمدى ايتامىن. وزىمە باتا بەرگەن اعالارىم ارۋاعى الدىندا باسىمدى يەمىن. وسى مىنبەدەن بارلىعىڭىزعا ريزاشىلىعىمدى ايتا وتىرىپ، ءتوراعالىققا سايلاۋعا تۇسپەيتىنىمدى جەتكىزگىم كەلەدى. ەندى جاڭادان سايلاناتىن باۋىرلارىمىزعا ساتتىلىك تىلەيمىن. ادەبيەتىمىز ماڭگى بولسىن!»، - دەدى نۇرلان ورازالين.
نۇرلان ورازالين بايانداماسىندا ادەبيەتكە قولداۋ بىلدىرگەن ءبىرقاتار وبلىس اكىمدەرى مەن الماتى قالاسى اكىمى باۋىرجان بايبەككە العىسىن ايتىپ، جاس جازۋشىلاردىڭ ادەبيەت الەمىنە جول اشقان كوممەرتسيالىق ۇيىم باسشىلارىنا ريزاشىلىعىن ءبىلدىردى.
ايتا كەتەيىك، بۇگىنگى قۇرىلتايدا جازۋشىلار وداعىنىڭ جاڭا باسشىسى سايلانادى دەپ كۇتىلۋدە.
