وسكەمەن كوشەلەرىن تاۋدان كەلگەن قارعىن سۋ باسىپ جاتىر

 وسكەمەن. قازاقپارات - وسكەمەننىڭ كوشەلەرىندە سۋ كولكىپ ءجۇر. ماماندار جاڭبىر مەن ەرىگەن قار سۋى تاۋدان اعىپ كەلىپ جاتقانىن ايتادى، دەپ حابارلايدى قازاقپارات ءتىلشىسى.

«كوشەدە كولىكتەر ءجۇزىپ ءجۇر» دەگەن تاقىرىپپەن ۋاتساپ مەسسەندجەرى ارقىلى ءتۇرلى ۆيدەولار تاراپ جاتىر. شىنىمەن دە قالا كوشەلەرىندە جاياۋ ادام تۇگىل كولىكپەن ءجۇرۋدىڭ ءوزى قيىنداپ كەتكەن. قالانىڭ تازالىعىنا جاۋاپتى مەكەمە ماماندارى مولشەردەن تىس سۋدى تاراتۋعا جەراستى قۇدىق جەلىلەرىنىڭ شاماسى جەتپەي جاتقانىن ايتادى.

«جاڭبىر مەن قار سۋىنا تاۋدان قۇلاعان لايساڭ قوسىلۋدا. مۇنشاما سۋدى جەراستى توراپتارى تاراتىپ ۇلگەرمەيدى. جىبەك جولى مەن ساتبايەۆ داڭعىلىنىڭ قيىلىسىنداعى سۋ شەشەك اسۋىنان جەتكەنى انىقتالدى. ال كراسين كەنتىنىڭ پۋشكين كوشەسىندەگى قارعىن سۋ بوتباي جوتاسىنان اعىپ كەلگەن. شمەليەۆ لوگ ەلدى مەكەنىنەن اققان سۋ ترامۆاي رەلستەرىن، مىزى جانە پيتەر كوممۋنارلارى كوشەسىنە جايىلدى. مالدىبايەۆ كوشەسى مەن سامسونوۆ كەنتىندە بىرنەشە وتباسى قاۋىپسىز جەرگە كوشىرىلدى. سۋ سورعىش تەحنيكالار ۇلگەرمەي جاتىر» - دەيدى «وسكەمەن ءتارتىپ» مەكەمەسىنىڭ ديرەكتورى تامارا راحىمجانوۆا.

ونىڭ ايتۋىنشا قالا اۋماعىندا 80 نەن استام قۇتقارۋشى، 26 گرەيدەر مەن فرونتالدى تيەۋىش تەحنيكا قارعىن سۋمەن كۇرەسكە جۇمىلدىرىلعان. مەردىگەر كومپانيالارمەن قاتار «وسكەمەن ۆودوكانال» مەكەمەسىنىڭ تەحنيكاسى دا تارتىلۋدا.

ەكى كۇن بويى توقتاماي جاۋعان جاڭبىردىڭ سوڭى قازىر قارعا ۇلاسا باستادى.