شىعىس قازاقستاندا تولاسسىز جاۋىن ەلدىڭ مازاسىن الۋدا
«تولاسسىز جاڭبىر سالدارىنان وبلىستىڭ بىرنەشە اۋىلىندا اۋلالار مەن ۇيلەردى سۋ الدى. تاۋلىك ىشىندە تۇسكەن جاۋىننىڭ مولشەرى قالىپتان بىرنەشە ەسە كوپ» - دەلىنگەن ش ق و توتەنشە جاعدايلار دەپارتامەنتىنىڭ باسپا ءسوز قىزمەتى تاراتقان مالىمەتتە.
سينوپتيكتەردىڭ ايتۋىنشا ءبىر تۇندە عانا جاۋعان جاۋىننىڭ دەڭگەيى 11 ميلليمەترگە جەتكەن. قالىپتى جاعدايدا ناۋرىزدىڭ العاشقى ون كۇندىگىندە تۇسەتىن جاۋىن- شاشىن مولشەرى 7 ميلليمەتردەن اسپايتىن. مۇنشا مولشەردەگى ىلعال ەلدى مەكەندەردى اۋرە- سارساڭعا سالا باستادى. ءدال قازىرگى ساتتە وبلىس بويىنشا التى ءۇي مەن 25 اۋلاعا سۋ جايىلعانى انىقتالدى. وسكەمەننىڭ وزىندە 4 جەر ۇيگە جانە 14 اۋلاعا، اياگوز اۋدانىندا 2 ءۇي مەن 6 اۋلاعا، ۇلان اۋدانىندا بەس اۋلاعا سۋ كىرگەن.
وبلىستىق توتەنشە جاعدايلار قىزمەتى تاراپىنان بۇل اۋماقتارعا 186 ادام مەن 46 تەحنيكا، 17 سۋ سورعىش قوندىرعى جۇمىلدىرىلعان.
«ءدال قازىر سۋ كىرگەن ۇيلەر مەن اۋلالاردى سۋدان تازارتىپ، قۇمنان بوگەت توسەۋ جۇمىستارى جۇرگىزىلىپ جاتىر. زارداپ شەككەن ادام جوق» - دەيدى وبلىستىق ت ج د وكىلى اناستاسيا سكليار.
ونىڭ ايتۋىنشا، ۇلان اۋدانىندا «وسكەمەن- الماتى» باعىتىنداعى جولدىڭ ەكى بولىگىندە سۋ جولدىڭ بەتىنە شىعىپ كەتكەن. «قازاۆتوجول» مەكەمەسى جايىلعان سۋدى بوگەۋ جۇمىستارىن قولعا الدى.
توتەنشە جاعداي دەپارتامەنتى قالىپتاسقان جاعدايعا بايلانىستى جەدەل شتاب قۇردى. «112» نومىرىنە ءبىر ءتۇننىڭ ىشىندە وبلىستىڭ تۇكپىر- تۇكپىرىنەن 300 دەن استام دابىل تۇسكەن. جاۋىننىڭ ازىرگە باسىلاتىن ءتۇرى جوق. بىرنەشە باعىتتاعى جولدار كوكتايعاق پەن كوشكىن قاۋپىنە بايلانىستى جابىق تۇر.
