پاۆلودارلىق وقۋشىلار قانت ديابەتىمەن اۋىراتىندارعا ەم بولاتىن سۋسىنعا پاتەنت الدى
بۇل تۋرالى اگەنتتىككە بيولوگيا ءپانىنىڭ مۇعالىمى تورعىن عينايات ايتتى.
«سوڭعى جىلدارى قانت ديابەتىمەن اۋىراتىن ناۋقاستاردىڭ سانى ارتىپ كەلە جاتقانى بەلگىلى. سوندىقتان اۋرۋدىڭ الدىن الۋ ماقساتىندا وسىنداي پايدالى ەمدىك سۋسىندى ازىرلەۋدى ءجون كوردىك. عىلىمي جەتەكشىسى - بيولوگيا عىلىمدارىنىڭ دوكتورى، پاۆلودار مەملەكەتتىك پەداگوگيكالىق ۋنيۆەرسيتەتىنىڭ بيوتسەنولوگيا جانە ەكولوگيالىق زەرتتەۋلەر ورتالىعىنىڭ ديرەكتورى، جالپى بيولوگيا كافەدراسىنىڭ پروفەسسورى بيبىگۇل جۇمابەكوۆا»، - دەيدى تورعىن عينايات.
ونىڭ ايتۋىنشا، وقۋشىلار عىلىمي جەتەكشىمەن بىرگە 2016 -جىلدىڭ قاڭتار ايىنان 2017 -جىلدىڭ ماۋسىم ايىنا دەيىن كوپ جۇمىس اتقارعان. ولار شاي ساڭىراۋقۇلاعىن ءوسىرۋ ءادىسىن زەرتتەپ، ميكروبيولوگيالىق زەرتتەۋلەر جۇرگىزگەن جانە ناتيجەسىن عىلىمي ماقالالاردا جاريالاعان. شاي ساڭىراۋقۇلاعى نەگىزىندە الىنعان «التىن باتىر» ديابەتتىك سۋسىنىنا ليمون جانە تۇيمەداق، قانت جانە جاساندى قانت قوسىلعان.
سونىمەن قاتار تابيعي سۋسىندار ءوندىرىسىنىڭ ماكەتىن قۇراستىرعان. وندىرىستىك جاعدايدا ءوندىرۋدىڭ تەحنولوگيالىق جاقتارىن قاراستىرىپ، وڭىرىمىزدەگى ورتالىقتاردىڭ بىرىندە ەكسپەريمەنتتىك تاجىريبە جۇرگىزگەن.
«بۇل جوبانى دايىنداۋ ءۇشىن كوپ ۋاقىت پەن كۇش جۇمسادىق. ءتۇرلى قالالارعا بارىپ، جوبامىزدى قورعادىق. جۇلدەلى ورىندارعا يە بولدىق. ءبىزدىڭ جوبامەن دايىندالاتىن سۋسىننىڭ پايداسى مول ەكەنىنە كۇمانىمىز جوق. ونىڭ قۇرامىنا شاي، قانت الماستىرعىش، سۋ جانە اشىتقى كىرەدى. تۇتىنۋشىلارعا ۇنايدى دەگەن سەنىمدەمىز»، - دەيدى جوبا اۆتورلارىنىڭ ءبىرى ادەل كامالدينوۆا.
جوبا جەتەكشىلەرى پايداسى مول ديابەتتىك سۋسىنداردى الداعى ۋاقىتتا جەرگىلىكتى دۇكەندەردەن ساتىپ الۋعا بولاتىنىن ايتادى.
