استانا ماڭىندا بالىقتاردىڭ نەدەن قىرىلعانىن ەكولوگتار انىقتاۋدا

توعاندا كوپ بالىق سۋ بەتىندە قالقىپ شىققان، دەپ حابارلايدى قازاقپارات ك ت ك تەلەارناسىنا سىلتەمە جاساي وتىرىپ.

توتەنشە جاعداي تۋرالى جەرگىلىكتى بيلىك وكىلدەرىنە بالىقشىلار حابارلاعان. توعانعا كەلگەن ولار سۋ بەتىنە شىققان ءولى بالىقتاردى كورگەن. مۇندايدى جەرگىلىكتى تۇرعىندار بۇرىن-سوڭدى كورمەگەن.

وقيعا ورنىنا ەكولوگتار شاقىرىلىپ، ماماندار توعاندى تەكسەرىپ كوردى. الايدا، بالىقتاردىڭ نەدەن قىرىلىپ جاتقانى تۋرالى ەشتەڭ ايتا المادى.

«اۋىلدىق وكرۋگ اكىمىنىڭ اپپاراتى ەكولوگتارمەن جانە تابيعات قورعاۋ پوليتسياسىمەن بىرلەسىپ، وقيعا ورنىنا باردى. وندا ءتيىستى اكت جاسالىپ، سۋدى زەرتتەۋ ءۇشىن زەرتحاناعا الىپ كەتتى. بۇل سۋ كوكشەتاۋ قالاسىنا باعىتتالعان. ازىرگە ەشقانداي ناتيجە جوق»، - دەدى اقمولا وبلىسى قوسشى اۋىلدىق وكرۋگى اكىمىنىڭ مىندەتىن اتقارۋشى سۇلتان وراقباي.

شەنەۋنىكتەردىڭ الدىن الا بولجامدارى بويىنشا، بالىقتارعا اۋا جەتپەي قالعان. ياعني سۋدا وتتەگى از. قاتتى ايازدىڭ سالدارىنان سۋدا قالىڭ مۇز قاتقان.

بالىقتاردىڭ قىرىلۋىنا نە سەبەپ بولعانى تۋرالى ناقتى جاۋاپتى تالداۋ جۇمىستارىنىڭ ناتيجەسىنە قاراي ايتۋعا بولادى. زەرتتەۋ جۇمىستارىنا بىرنەشە كۇن كەتەدى.

فوتو: kopyl.by