الماتىلىقتار ناۋرىزدى قالاي تويلايدى

الماتى. قازاقپارات - الماتىلىقتار ناۋرىز مەرەكەسىن بيىل جاڭا فورماتتا تويلاماق، دەپ حابارلايدى قازاقپارات ءتىلشىسى.

 قالادا حالىقارالىق ايەلدەر كۇنى - 8 - ناۋرىز مەرەكەسى اياقتالىسىمەن ءبىر اي بويىنا اتالىپ وتەتىن «ناۋرىز-2018» مەرەكەسىنە دايىندىق شارالارى باستالادى.

 نەگىزگى مەرەكەلىك شارالار مەگاپوليستىڭ بىرنەشە الاڭدارىندا 22 - 25 - ناۋرىز ارالىعىندا ساعات تاڭعى 10:00-دەن كەشكى 21:00-گە دەيىن وتەدى.

استانا الاڭىندا جىل سايىنعى ءداستۇرلى ۇلكەن مەرەكەلىك كونسەرت، ۇلتتىق اس ءمازىرى فەستيۆالى وتەدى. جالپى، بۇل كۇندەرى الاڭدا 6 كيىز ءۇي تىگىلەدى. 14 ينستاللياتسيا («كەرەگە قۇراق»، «قوس»، «ابىلايشا») ورناتىلادى، بالالار جانە سپورت ورىندارى، ساۋدا شاتىرلارى، فۋدكورتتار، 1200 ورىندىق كورەرمەندەر تريبۋناسى ۇيىمداستىرىلادى. نەگىزگى مەرەكەلىك كونتسەرتكە تمد- نىڭ 6 ەلىنەن جانە تۇركيادان 500-دەن استام ءارتىس پەن 1500 ەرىكتى قاتىسادى.

مەرەكە فەيەرۆەرككە ۇلاسادى.

 جاڭارعان پانفيلوۆ جانە جىبەك جولى كوشەلەرىندە 22-25 - ناۋرىز كۇندەرى ساعات تاڭعى 10:00 مەن كەشكى 22:00 ارالىعىندا مەرەكەلىك شارالار بولادى. بۇل كۇندەرى مۇندا  120000-نان استام ادام كەلەدى.

 ايتا كەتەيىك، 2016 -جىلى كوپ ۇلتتى «ناۋرىز» جوباسى يۋنەسكو- نىڭ ماتەريالدى ەمەس مادەني مۇراسىنىڭ رەپرەزەنتاتيۆتى تىزىمىنە ەنگەن بولاتىن. بۇل باستاماعا 12 ەل: يران، قازاقستان، ازەربايجان، وزبەكستان، قىرعىزستان، تۇركيا، ءۇندىستان، پاكىستان، اۋعانستان، يراك، تۇرىكمەنستان جانە تاجىكستان قولداۋ ءبىلدىردى.

 ەندى شەتەلدىكتەر جاڭارعان پانفيلوۆ كوشەسىندە كيىز ءۇي تىگۋ، قىش، كەراميكا، كيىزدەن، مەحەنەدەن بۇيىمدار جاساۋ بويىنشا ارنايى شەبەرلىك كلاستارىن وتكىزەدى.

 سونىمەن قاتار، التىن جىپپەن بۇيىم تىگۋ، ورتەكە، شىرداق، زەرگەرلىك بۇيىمدار مەن شىنى جاساۋ كلاسستارى دا ۇيىمداستىرىلادى. بۇلاردان وزگە تەاترلاندىرىلعان «كوش كەرۋەنى» جۇرەدى.

22 - ناۋرىزدا جۇرگەنوۆ اكادەمياسى جانىنداعى ساحنادا وتەتىن كونسەرتتىك باعدارلامادا ونەر اكادەمياسىنىڭ ستۋدەنتتەرى ونەر كورسەتەدى.

 سونىمەن قاتار قالانىڭ جوعارى وقۋ ورىندارى اراسىندا «ءان بايگە» اتتى اۆتورلىق ءان كونكۋرسى، «بيلە- بيلە» كوڭىل كوتەرەتىن شارا مەن «ءاز ناۋرىز الاتاۋ الابىندا» اتتى تەاترلاندىرىلعان قويىلىم كورسەتىلەدى.

 22 - ناۋرىزدا مەرەكەلىك باعدارلاما اتلەتتەر اۋىلىندا جالعاسادى.

 وندا سپورت سەكسيالارى مەن « DIDCO ستيلىندەگى ناۋرىز» كونسەرتىنە قاتىسۋشىلار ءۇشىن ءتۇرلى ۇتىستار مەن بايقاۋلار وتەدى. بەلسەندىلىكتى ارتتىرۋ ماقساتىندا قازاق كۇرەسىنەن، دجيۋ- دجيسۋدان، تاەكۆوندودان، كاراتەدەن، بوكستان جارىستار ۇيىمداستىرىلىپ، سپورتشىلار ءتۇرلى ادىستەردى كورسەتەدى. اتالعان سايىسقا نيەت بىلدىرۋشىلەر دە قاتىسا الادى. شاحماتتان، توعىز قۇمالاقتان شەبەرلىك سىنىپتارى وتەدى، حورەوگرافيا ستۋديالارى قارا جورعا، قاماجاي جانە باسقا بيلەردى ۇسىنادى، بي باتلى بويىنشا فلەشموب ۇيىمداستىرىلادى.

 مۋزىكالىق ستۋديا ۇزىلىستەر كەزىندە دومبىرامەن كۇي شەرتەدى، حوككەي اكادەمياسى ناعىز حوككەي ماتچىن وتكىزەدى. بۇلاردان وزگە توپتىق جارىستار دا وتەدى، ولار: ەستافەتالار، ستول تەننيسى، ۇرلەنگەن باتۋت، ارمرەسلينگ، ارقان تارتۋ، وبرۋچ، ارقانمەن سەكىرۋ، اسىق اتۋ، انيماتورلاردىڭ قاتىسۋىمەن ءتۇرلى شارالار، بەلسەندى ينتەراكتيۆ: شىڭعا ورمەلەۋ، ساداق اتۋ، بوۋلينگ، دارتس جانە باسقالارى. وتتى شوۋ ۇسىنىلىپ، يلليۋزيونيستەر، سيقىرشىلار ونەر كورسەتەدى.

 22 - ناۋرىزدا «الماتى ارەنا» ماڭىندا «ناۋرىز - بۇكىلالەمدىك مادەني مۇرا» باعدارلاماسى وتەدى. اسپازدىق شەبەرلىك سىنىپتارىندا شەتەلدىك قوناقتار اس ءپىسىرۋدىڭ قىر- سىرىن ۇيرەتەدى.

 ازەربايجان اسپازدارى - لاۆاشتا كۇرىش، پاحلاۆا مەن بويالعان جۇمىرتقا؛ تۇرىك اسپازدارى - شپيناتتى بورەك، لۋكۋم؛ تۇرىكمەن اسپازدارى - چۋرەك، پيشمە، چاپاد، كۇلشە، تاتتىلەر؛ اۋعان اسپازدارى - جەتى جەمىستىڭ كومپوتىن؛ وزبەك اسپازدارى سۋمالياك پەن «ناۋرىز كوجە»؛ يران اسپازدارى بويالعان جۇمىرتقالار مەن قۇرعاق جەمىستەر، كاۋاپ؛ تاجىك اسپازدارى ءتاتتى كۇرىش؛ ءۇندى اسپازدارى «تانداي» سۋسىنىن، ازيا اس ءمازىرى wok-كەسپەنى؛ گرۋزين اسپازدارى حاچاپۋريىن، كاۋاپتارىن؛ ال قازاقتىڭ اس مازىرىنەن «ناۋرىز كوجە»، باۋىرساق، قاتتاما ءپىسىرىپ ۇيرەتەتىن بولادى.

 بۇلاردان وزگە، «Almaty Art Center»  الدىنا ساۋدا الاڭى ۇيىمداستىرىلىپ، وندا قوناقتارعا "Qazaq Oner" ورتالىعىنىڭ ۇلتتىق سۋۆەنيرلەرى، كيىمدەر، مۋزىكا اسپاپتارى ۇسىنىلادى.

 23 - ناۋرىزدا «الماتى ارەنادا» «DIDCO ستيلىندەگى ناۋرىز» اتتى ۇلكەن كونتسەرت وتەدى، وندا الەمگە تانىمال  توپتار ونەر كورسەتەدى.

 جىبەك جولى بويىنداعى ساحنادا 24-ناۋرىزدا «ناۋرىز- دۋمان» وتەدى. مۇندا 11:00-دەن 17:00-گە دەيىن ق ر سۋرەتشىلەر وداعى شەبەرلەرى مەن جاس سۋرەتشىلەردىڭ بىرىككەن پلەنەرى، 19:00-21:00 ارالىعىندا - «Open air cinema» وتەدى. كوپشىلىككە ش. ايمانوۆتىڭ رەتروسپەكتيۆتى كينولارى مەن قازاقستاننىڭ ماتەريالدى ەمەس مادەني مۇراسى بولىپ تابىلاتىن «قىز جىبەك»، «ورتەكە»، «كيىز باسۋ»، «قورقىت اتا مۇراسى: ەپيكالىق مادەنيەت جانە مۋزىكا»، «قازاقتىڭ زەرگەرلىك بۇيىمدارى»، «كەستە»، «اسىق اتۋ» جانە باسقا فيلمدەر كورسەتىلەدى.