باۋىرجان بايبەك الماتى تۇرعىندارىنا باسپانا الۋ جەڭىلدىكتەرى تۋرالى ايتتى

الماتى. قازاقپارات - بۇگىن الماتى اكىمى باۋىرجان بايبەك قالا اكتيۆىمەن كەزدەسۋ بارىسىندا مەملەكەت باسشىسىنىڭ اۋقىمدى الەۋمەتتىك جوبالارىن جۇزەگە اسىرۋدا مەگاپوليستە اتقارىلاتىن جۇمىستار تۋرالى ايتتى، دەپ حابارلايدى قازاقپارات ءتىلشىسى.

 الماتى اكىمىنىڭ ايتۋىنشا، مەملەكەت باسشىسىنىڭ ەلدى مودەرنيزاتسيالاۋ باستاماسى كەشەندى سيپاتتا، ءارى بارلىق سالالاردى قامتيدى.

مىسالى، كونستيتۋتسيالىق رەفورما بيلىك تارماقتارىنىڭ ناقتىلى باللانسىن بەلگىلەدى ءارى جەرگىلىكتى ءوزىن - ءوزى باسقارۋدىڭ دامۋىنا جاڭا سەرپىلىس بەردى. ەلىمىزدە ەكونوميكالىق مودەرنيزاتسيالاۋ جانە سيفرلاندىرۋ بويىنشا قوماقتى جۇمىستار ءجۇرىپ جاتىر. ءوز كەزەگىندە «رۋحاني جاڭعىرۋ» باعدارلاماسى رۋحانيلىقتىڭ، ۇلتتىق سانانىڭ جاڭارۋىن قامتاماسىز ەتتى. ولار اشىقتىق، پراگماتيزم، ءبىلىم مادەنيەتى، باسەكەلەستىك پرينتسيپتەرىنە نەگىزدەلدى.

«ەلباسى جوبالارى - حالىقتىڭ تۇرمىسىن جاقسارتۋعا باعىتتالعان ءارى ناقتى، قاجەتتى رەسۋرستارمەن نەگىزدەلگەن باعدارلامالار. بەس الەۋمەتتىك باستاما - پرەزيدەنتتىڭ ساليقالى ساياساتىنىڭ ءبىرى جانە ادامعا دەگەن شىنايى قامقورلىقتىڭ ناقتىلى كورىنىسى. ءبىزدىڭ مىندەتىمىز اتالعان تاپسىرمالاردى جەدەل ورىنداۋعا كىرىسۋ جانە ءاربىر الماتىلىقتىڭ وسىناۋ اۋقىمدى الەۋمەتتىك جوبالاردىڭ وڭ ناتيجەسىن كورۋلەرىنە ىقپال ەتۋ. ول ءۇشىن بىزدە بارلىق رەسۋرستار بار»، - دەدى باۋىرجان بايبەك.

قالا اكىمى قولجەتىمدى باسپانا سالۋ قالا بيلىگىنىڭ نەگىزگى مىندەتى ەكەنىن جەتكىزدى.

ونىڭ ايتۋىنشا، 2017 -جىلى قۇرىلىس قارقىنى 4 ەسە وسكەن. الماتىدا كەزەكتە تۇرعان ءاربىر ءۇشىنشى ادام پاتەر الدى. 1,9 ميلليون شارشى مەتر تۇرعىن ءۇي نەمەسە 16,5 مىڭ جاڭا پاتەر سالىندى. ايتا كەتەرلىگى، الداعى ۋاقىتتا تاعى دا 1,5 ميلليون شارشى مەتر تۇرعىن ءۇي نەمەسە 17 مىڭنان استام پاتەر سالىنادى.

بۇلاردان وزگە «الماتى جاستارى» الەۋمەتتىك باعدارلاماسىن ورىنداۋ ءۇشىن جەرگىلىكتى بيۋدجەتتەن بيىل 2 ميلليارد تەڭگە بولىنگەنى تاعى ايتىلدى.

باعدارلاماعا قاتىساتىن جاس وتباسىلار العاشقى جارنانى تولەمەي- اق 5  پايىزدىق تۇرعىن ءۇي نەسيەسىن الادى.

مەگاپوليس باسشىسى الماتىدا 50 مىڭنان استام ستۋدەنتتىڭ جاتاقحاناعا ءزارۋ ەكەنىن ايتتى. وتكەن جىلى 2 مىڭ ورىندىق 4 جاتاقحانا سالىنسا، 2020 -جىلعا دەيىن تاعى دا 20 جاتاقحانا سالۋ جوسپارلانعان.

بۇگىندە قالادا 27 مىڭنان استام جاس جەتكىنشەك كوللەدجدە تەگىن ءبىلىم الىپ جاتىر. ەلباسى تاپسىرماسى بويىنشا 2016 -جىلدان باستاپ بالاباقشا اقىسى بيۋدجەت ەسەبىنەن 2,5 ەسە ازايدى.

تۇرعىن ءۇي بويىنشا 2 مىڭنان استام قالا تۇرعىنى الەۋمەتتىك كومەك الىپ جاتىر. قالا اكىمدىگى كوممۋنالدىق قىزمەت تاريفتەرىن سۋبسيديالاۋدا. 2015 -جىلدان تاريفتەردى ۇستاپ تۇرۋ ءۇشىن جەرگىلىكتى بيۋدجەتتەن 3 ميلليارد تەڭگەدەن استام قارجى ءبولىندى.

ال ينجەنەرلىك جەلىلەردى مودەرنيزاتسيالاۋعا 100 ميلليارد تەڭگە كولەمىندە قارجى قاراستىرىلدى.

باۋىرجان بايبەك قالا اكتيۆىمەن كەزدەسۋ بارىسىندا جەكە سەكتوردىڭ جىل اياعىنا دەيىن تولىق گازداندىرىلاتىنىن، 2021 -جىلى الماتى اگلومەراتسيا اۋماعىنداعى 4 مىڭ جەكە ءۇي گازعا قوسىلاتىنىن جەتكىزدى. ەلباسىنىڭ تاپسىرماسى بويىنشا ج ە و-2 گازعا كوشىرىلەدى، ەنەرگەتيكا مينيسترلىگىنىڭ ەسەبى بويىنشا سونىڭ ارقاسىندا ج ە و- نىڭ اۋاعا شىعاراتىن زالالى 30 ەسە ازايادى.

اۆتور: گۇلميرا عوسمانالي