يسا پايعامباردىڭ شىنايى ءتۇر-تۇلعاسىن اعىلشىن عالىمدارى انىقتادى
ال عالىمدار نە دەيدى؟ ولاردىڭ ايتۋىنشا، ءبىزدىڭ زامانىمىزدا قالىپتاسقان ۇيرەنشىكتى بەينە يسا پايعامباردىڭ شىنايى ءتۇر-تۇلعاسىنا مۇلدەم ۇقسامايدى ەكەن. ۇقساعانى بىلاي تۇرسىن، عالىمدار سيپاتتاپ بەرگەن يسا پايعامباردىڭ بەت-بەينەسى باسقا ادامدى كوز الدىڭا اكەلەدى.
ناقتىراق ايتقاندا، لوندون قالاسىنداعى كورولدىك كوللەدجدىڭ پروفەسسورى دجوان تەيلوردىڭ قالامىنان تۋعان «يسانىڭ ءتۇر-تۇلعاسى قانداي ەدى؟» دەپ اتالاتىن كىتابىندا كەلتىرىلگەن دەرەكتە: ىنجىلدە ايتىلعانداي، يسا ءبىزدىڭ ءداۋىرىمىزدىڭ 4- جىلىندا ۆيفلەەمدە دۇنيە كەلگەن يۋدەي. ول مىسىردا از ۋاقىت تۇرىپ، نازارەتكە قونىس اۋدارعان. پروفەسسور LiveScience باسىلىمىنا بەرگەن سۇحباتىندا سول زامانعى يۋدەيدەگى جانە مىسىرداعى ەۆرەيلەردىڭ سىرتقى بەينەسىنەن حابار بەرەتىن ارحەولوگيالىق بۇيىمدار مەن ماتىندەرگە نازار اۋدارعانىن جەتكىزگەن.
سونداي-اق، ول مىسىرلىق مۋميالار مەن تيىندارعا دا نازار اۋدارعان ەكەن. ونىڭ زەرتتەۋ ناتيجەسىنە سەنسەك، يسا پايعامباردىڭ بويى شامامەن 1,7 م بولعان. بۇل سول كەزدەگى يۋدەيدەگى ەرلەردىڭ بويىنا ءتان ولشەم بولعان. ول بۇل تۇجىرىمىن سول كەزدەگى اتالعان اۋماقتان تابىلعان ادام قاڭقالارىنا قاراپ جاساعان ەكەن.
سونداي-اق، سول زامانداعى مىسىر مەن يۋدەيدەگى ادامداردىڭ كوبىسىنىڭ كوز قاراشىعىنىڭ قارا، شاشى دا قارا بولعانىن، قارا تورى كەلگەنىن العا تارتىپ وتىر. ويتكەنى، ارحەولوگيالىق، تاريحي دەرەكتەر وسىنداي. يۋدەي مەن ەۋروپا اراسىندا، سونداي-اق، يۋدەي مەن ەفيوپيا اراسىندا ءوزارا ساۋدا-ساتتىق جانە ساياسي بايلانىس جولعا قويىلعانىن ايتا كەلىپ، ەۆرەيلەر مەن مىسىرلىقتار كوبىنە اققۇبا ەۋروپالىقتارمەن كوڭىل جاراستىرىپ، شاڭىراق كوتەرگەنىن دە كەلتىردى.
سول كەزدەگى ەۆرەيلەر شاشىن دا، ساقالىن دا قىسقا ەتىپ قيدىرىپ وتىرعان. يسا پايعامبار دا زامانداستارى سەكىلدى قىسقا شاشتى بولعان. ەۆانگەليادا يسا پايعامبار اعاش ۇستاسى، كوپ ساياحاتتاعان ادام رەتىندە سۋرەتتەلگەن.
«يسانىڭ ءتۇر-تۇرپاتى ەڭبەك ادامىنا كوبىرەك كەلەدى. سول سەبەپتى، ونى ادەتتەگىدەي ەڭبەك ەتپەگەن ادام سەكىلدى سيپاتتاعاندى قويۋ كەرەك»، - دەپ تۇجىرىپتى پروفەسسور.
