استاناداعى جاۋىن-شاشىن كوممۋنالدىق قىزمەتتەردى ابىگەرگە سالۋدا - فوتو

استانا. قازاقپارات - ەلوردانىڭ كوممۋنالدىق قىزمەتتەرى جاۋىن-شاشىنعا بايلانىستى كۇشەيتىلگەن جۇمىس رەجىمىنە كوشىرىلدى، دەپ حابارلايدى قازاقپارات استانا اكىمدىگىنىڭ سايتىنا سىلتەمە جاساپ.

«قالا اۋماعىندا 3120 تەكشە مەتر ەرىگەن قار سۋى سورعىمەن الىندى جانە 7070 تەكشە مەتر قار شىعارىلدى. جاڭبىر سۋى اعاتىن جۇيەلەردىڭ 346 تورى تازالانىپ، جۋىلدى. حالىق كوپ جينالاتىن 143 نىساندا قاردان تازارتۋ جۇمىستارى جۇرگىزىلدى. سونداي-اق سۋ تاسقىنىنا قارسى شارالار اياسىندا قالا اۋداندارىنداعى جەكە سەكتورلاردان قار شىعارۋ جۇمىستارى جالعاسۋدا»، - دەلىنگەن ەلوردا اكىمدىگىنىڭ حابارلاماسىندا.

ايتا كەتەيىك، استانادا سۋ تاسقىنىنا دايىندىق جۇمىستارىنىڭ باستالعانىنا ءبىراز ۋاقىت بولدى. ەلوردا اكىمى سۋ تاسقىنىنا قارسى شارالاردىڭ كەشەندى جوسپارىن بەكىتكەن ەدى. جوسپار 202 تارماقتان تۇرادى جانە ولارعا جاۋاپتى رەتىندە اكىمدىكتىڭ 22 قۇرىلىمدىق بولىمشەسى، 8 مينيسترلىك ورگانى مەن بولىمشەلەرى جانە 2 كوممۋنالدىق كاسىپورىن بەلگىلەنگەن.

«استانا مونيتورينگ جانە جەدەل ارەكەت ەتۋ ورتالىعىنىڭ قالاداعى قار تازالاۋدىڭ ساپاسىن باقىلاۋىنىڭ ارقاسىندا كوممۋنالدىق قىزمەتتەر قالا اۋماعىنان جانە تۇرعىن ءۇي الاپتارىنان قاردى ۋاقىتىلى شىعارۋدا. رۇقسات ەتىلمەگەن جەردە قار ءۇيىندىسىن كورسەڭىز، قالالىق مونيتورينگ جانە جەدەل ارەكەت ەتۋ ورتالىعىنىڭ 109 نومىرىنە حابارلاسىڭىز نەمەسە Facebook, Instagram جەلىلەرىندە #astana109 حەشتەگىمەن جازبا قالدىرىڭىز»، - دەلىنەن قالا اكىمدىگىنىڭ سايتىندا.

ەسكە سالايىق، «قازگيدرومەت» رمك 5-7- ناۋرىز كۇندەرى ارالىعىندا قازاقستانىڭ ءبىرقاتار وڭىرىندە، سونىڭ ىشىندە اقمولا وبلىسىنىڭ اۋماعىندا كۇن رايىنىڭ بۇزىلۋىنا وراي ەسكەرتۋ جاريالاعان بولاتىن.

بۇگىن استانا قالاسىندا اۋا تەمپەراتۋراسى كۇندىز 3+.. 5+ گرادۋسقا دەيىن جىلىندى. كۇشتى جەل سوعىپ، جاڭبىر جاۋدى. بارلىق مەكتەپتەردە 1-11- سىنىپ ارالىعىندا ساباقتار توقتاتىلدى. سونداي-اق كوكتايعاق پەن قاتتى جەلگە بايلانىستى اقمولا، سولتۇستىك قازاقستان جانە پاۆلودار وبلىستارى اۋماعىندا كولىكتىڭ بارلىق تۇرلەرى ءۇشىن بۇكىل باعىتتا جولدار جابىلدى.

اۆتور: ايجان سەرىكجان قىزى