قازاقستان- قىتاي ىنتىماقتاستىعىنا ۇلەس قوسقانى ءۇشىن «قازاقپارات» ح ا ا باس رەداكتورى ماراپاتتالدى

None
None
استانا. قازاقپارات - حالىقارالىق ايەلدەر كۇنى قارساڭىندا استانادا قىتاي حالىق رەسپۋبليكاسىنىڭ قازاقستانداعى ەلشىلىگى سالتاناتتى قابىلداۋ وتكىزدى، دەپ حابارلايدى قازاقپارات ءتىلشىسى.

سالتاناتتى كەشتە ق ح ر قازاقستانداعى توتەنشە جانە وكىلەتتى ەلشىسى چجان حانحۋەي قىتاي-قازاقستان ىنتىماقتاستىعىنا ەلەۋلى ۇلەس قوسىپ جۇرگەن قازاقستاندىق ايەلدەردى ماراپاتتادى.

ماراپاتقا يە بولعان نازىك جاندىلار اراسىندا «قازاقپارات» ح ا ا باس رەداكتورى بيبينۇر سۇلتان قىزى تانەلبايەۆا دا بار.

«كوكتەمدە وزەندەردىڭ مۇزى ەريدى، بار تىرشىلىك جاندانادى. ال ءبىز اسپانداعى كۇن ءتارىزدى جارقىرايمىز». 1939-جىلى تانىمال قىتايلىق مۋزىكانت، قىتاي مەن قازاقستان دوستىعىنىڭ دانەكەرى بولعان سيان سينحاي 8 ناۋرىزدا ايەلدەردىڭ سۇلۋلىققا، بوستاندىققا تالپىنىسى تۋرالى ءدال وسىلاي اندەتىپ ەدى. تاريحقا قاراساق، ايەلدەردىڭ جەتىستىككە جەتۋى ارقىلى بۇكىل ادامزات بالاسى جەتىستىككە جەتكەن ەكەن. ءتوراعا شي جينپيڭ 2015-جىلى بۇكىل الەمدىك ايەلدەر ءسامميتىنىڭ اشىلۋىندا ايەلدەردىڭ دامۋىنداعى قارىشتى قادامدارعا قاراپ، ولاردىڭ جان-جاقتى دامۋىنا قاتىستى قىتايلىق باستامانى ۇسىنعان ەدى»، - دەپ اتاپ ءوتتى ديپلومات ءوزىنىڭ قۇتتىقتاۋ سوزىندە.

سونىمەن بىرگە، سالتاناتتى قابىلداۋدا قر اۋىل شارۋاشىلىعى ۆيتسە-ءمينيسترى گۇلميرا يسايەۆا، مادەنينت جانە سپورت مينيسترلىگى يندۋستريا جانە تۋريزم كوميتەتىنىڭ ءتورايىمى ماينۇرا مىرزاماديەۆا، ق ر تۇڭعىش پرەزيدەنتى - ەلباسى كىتاپحاناسى قىتاي زەرتتەۋ ورتالىعىنىڭ ديرەكتورى گۇلنار شايمەرگەنوۆا جانە قازاقستاننىڭ ەڭبەك سىڭىرگەن ءارتىسى مايرا مۇحامەد قىزى ق ح ر ەلشىسىنىڭ العىس حاتىمەن ماراپاتتالدى.

«قىتاي حالىق رەسپۋبليكاسى قۇرىلعان 68 جىلدان بەرى قىتاي بيلىگى ايەلدەردىڭ مۇددەسى مەن قىزىعۋشىلىعىن قورعاۋعا جانە دامىتۋعا ءجىتى كوڭىل ءبولىپ كەلەدى. قازىرگى ۋاقىتتا قىتايدا ايەلدەردىڭ ورتاشا ءومىر ءسۇرۋ ۇزاقتىعى - 79,4  جىل، جوعارى وقۋ ورىندارىنداعى قىزداردىڭ ۇلەسى - %52,4. ايەلدەر قوعامداعى جۇمىس ىستەيتىن ازاماتتاردىڭ 42,9 پروتسەنتىن قۇرايدى. ينتەرنەت- كاسىپكەرلەردىڭ 55 پروتسەنتى - ايەلدەر. سوڭعى جىلدارى قىتايدىڭ ورتالىق مەملەكەتتىك ورگاندارىنا قابىلداناتىن ايەلدەردىڭ پروتسەنتتىك قاتىناسى %51,9 جەتتى. بۇل قىتاي وركەنيەتى جەتىستىگىنىڭ دالەلى عانا ەمەس، قىتايلىق تاراپتىڭ الەمدەگى تەڭدىككە، بەيبىتشىلىكتىڭ دامۋىنا قوسقان ۇلەسى»، - دەيدى ق ح ر ەلشىسى.

سونداي-اق، ديپلومات ءوز سوزىندە بارشا قازاقستاندىق ايەلدەردى كەلە جاتقان مەرەكەمەن قۇتتىقتادى.

«پرەزيدەنت نۇرسۇلتان نازاربايەۆ ايەل ادامدى بۇركەپ ۇستاۋدىڭ قازاقستاندىق داستۇرگە جات ەكەنىن ايتقان بولاتىن. تاۋەلسىزدىكتىڭ 26 -جىلىندا قازاقستانداعى ايەلدەردىڭ قوعامداعى ماڭىزى ارتىپ كەلەدى. قازىرگى ۋاقىتتا، قازاقستاندىق ايەلدەر ەلدەگى مەملەكەتتىك قىزمەتشىلەر سانىنىڭ %55,5- ءتى قۇراپ وتىر. بارلىق انالارعا، ايەلدەرگە جانە قىزدارعا مىقتى دەنساۋلىق پەن ماڭگى جاستىق تىلەيمىن. ءاربىر ايەلگە ءماندى ءومىر مەن ارماندارىنىڭ ورىندالۋىن تىلەيمىن. قىتاي مەن قازاقستان دوستىعى گۇلدەنە بەرسىن!» - دەپ ءوز ءسوزىن تۇيىندەدى ەلشى چجان حانحۋەي.

سوڭعى جاڭالىقتار