سەرىك ساپيەۆ قازاقستاندىقتاردىڭ دەپۋتاتتارعا قانداي ماسەلەمەن كوپ جۇگىنەتىنىن ايتتى

استانا. قازاقپارات - ق ر پارلامەنتى ءماجىلىسىنىڭ دەپۋتاتتارىنا تۇسەتىن وتىنىشتەردىڭ باسىم بولىگى باسپانا ماسەلەسىن شەشۋمەن بايلانىستى.

بۇل تۋرالى بۇگىن ەلباسىنىڭ 5 الەۋمەتتىك باستاماسىن تالقىلاۋعا ارنالعان قازاقستان جاستارىنىڭ فورۋمىندا ءماجىلىس دەپۋتاتى سەرىك ساپيەۆ ايتتى، دەپ حابارلايدى قازاقپارات.

«سايلاۋشىلارمەن قانشا كەزدەسسەك تە الدىمىزدان شىعاتىن، قانشاما حات كەلەتىن ەڭ ۇلكەن پروبلەما باسپانا بولىپ وتىر. بىزگە كەلىپ تۇسەتىن وتىنىشتەردىڭ شامامەن 70 پايىزى تۇرعىن ءۇي پروبلەماسىنا قاتىستى بولادى. ال پرەزيدەنتتىڭ بۇل جولعى ۇسىنىسى قوعامداعى وسىناۋ پروبلەمانى شەشۋدىڭ ءبىر جولى دەپ بىلەمىن. دۇرىس ۇسىنىس جاسالدى، مىندەت ايقىن»، - دەدى ول.

سونىمەن قاتار دەپۋتات ءبىلىم الۋعا قوسىمشا 20 مىڭ گرانت ءبولۋ، ەلىمىزدىڭ سولتۇستىك وڭىرلەرىن، ونىڭ ىشىندە استانانى گازداندىرۋ ماسەلەسىن شەشۋ قولدان كەلەتىندىگىن اتاپ ءوتتى.

ايتا كەتەرلىگى، كەشە ق ر پارلامەنتى پالاتالارىنىڭ بىرلەسكەن وتىرىسىندا ەلباسى نۇرسۇلتان نازاربايەۆ قازاقستاندىقتاردى باسپانامەن قامتاماسىز ەتۋگە باعىتتالعان جاڭا باعدارلامانى جاريا ەتكەن بولاتىن.