ارزان يپوتەكا بارىنە جەتەدى - مينيستر قاسىمبەك
«شىنى كەرەك، ارزان يپوتەكا بويىنشا جۇمىس ىستەيتىن جاڭا كومپانيانىڭ شارتتارى وتە ءتيىمدى بولادى. جىلدىق مولشەرلەمە - 7 پروتسەنت، مەرزىمى - 25 جىل. سوسىن العاشقى جارنا دا تۇرعىن ءۇي قۇرىلىس جيناق بانكىمەن سالىستىرعاندا ءتيىمدى بولىپ تۇر. ول جاقتا العاشقى جارنا 30-50 پروتسەنت بولسا، جاڭا باعدارلامادا 20 پروتسەنت قانا. ارينە، حالىق تاراپىنان ونداي شارتتارعا سۇرانىس جوعارى بولادى. سونىڭ ارقاسىندا يپوتەكا مەن قۇرىلىس سالاسى جاندانا تۇسەدى»، - دەدى ج. قاسىمبەك ۇكىمەت وتىرىسىنان كەيىنگى باسپا ءسوز ءماسليحاتىندا.
ءمينيستردىڭ ايتۋىنشا، ءبىر اپتانىڭ ىشىندە ۇلتتىق بانكپەن بىرگە جاڭا باعدارلامانى ىسكە اسىرۋ جوسپارى دايىندالادى. اتالعان قۇجاتتا ارزان يپوتەكانى بەرۋدىڭ ناقتى جولدارى كورسەتىلەدى.
«قازىرگى كەزدە تۇرعىن ءۇي قۇرىلىس جيناق بانكى بارلىق يپوتەكانىڭ جارتىسىنان كوبىن الىپ وتىر. مەنىڭشە، جاڭا كومپانيانىڭ كەلۋىمەن باسەكە قىزا تۇسەدى. البەتتە، حالىق ارزان يپوتەكانى اسىعا كۇتىپ وتىر. كومپانيا قۇرىلعاننان كەيىن ادام كەزەگى دە كوبەيدى. ونى دا جاقسى تۇسىنەمىز. الايدا مەملەكەت باسشىسى يپوتەكا سالاسىنا ءبىر تريلليون تەڭگەگە دەيىن قارجى تارتۋدى تاپسىرعان بولاتىن. سوندىقتان جاڭا باعدارلامانى قاربالاسسىز ىسكە اسىرىلۋى ءتيىس»، - دەپ اتاپ كورسەتتى ج. قاسىمبەك.
ايتا كەتەيىك، پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى نۇرسۇلتان نازاربايەۆ قازاقستاندىقتاردى باسپانامەن قامتاماسىز ەتۋدىڭ جاڭا باعدارلاماسىن ازىرلەۋدى تاپسىردى. وسىعان بايلانىستى ق ر ۇلتتىق بانكى جانىنان 7 پروتسەنتتىك يپوتەكانى بەرەتىن جاڭا كومپانيا قۇرىلادى.
اۆتور: ارمان اسقاروۆ
