سيفرلى قازاقستان: و ق و-دا ۇستازدار، اتا-انالار مەن بالالار سايىسقا ءتۇستى

بايقاۋدى قالالىق اكىمدىك پەن ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وقو بويىنشا دەپارتامەنتى ۇيىمداستىردى، دەپ حابارلايدى قازاقپارات ءتىلشىسى.

جاڭا تەحنولوگيانىڭ قىر-سىرىن مەڭگەرگەندەردىڭ بىرىنشىلىگىنە شىمكەنت قالاسىنىڭ اكىمى نۇرلان ساۋرانبايەۆ قاتىستى. اتالعان سايىس «سيفرلىق قازاقستان» مەملەكەتتىك باعدارلاماسىن جۇزەگە اسىرۋ بارىسىندا حالىققا ەلەكتروندى قىزمەت كورسەتۋدى جەدەلدەتۋ مەن جەڭىلدەتۋ ماقساتىندا ۇيىمداستىرىلدى. وندا قالالىق ءبىلىم مەكەمەلەرىنەن ىرىكتەلگەن ۇزدىك 5 مەكتەپتىڭ توپتارى ءوزارا باق سىنادى. توپتىڭ قۇرامىندا ەكى-ەكىدەن ۇستاز، وقۋشى مەن اتا- انا بولدى. سولاردىڭ اراسىنان وزا شاپقان №65 مەكتەپ- گيمنازياسىنىڭ «ساندىق الەم.kz»  كومانداسى جەڭىسكە جەتتى.

«سيفرلى قازاقستان» زياتكەرلىك سايىسىندا قاتىسۋشىلار e-gov.kz ەلەكتروندى ۇكىمەت پورتالىنداعى حالىققا قىزمەت كورسەتۋ تۇرلەرىنە قاتىستى بىلىمدەرىن جان- جاقتى كورسەتە ءبىلدى.

ۇيىمداستىرۋشىلار الداعى ۋاقىتتا بۇل سايىس ەستافەتا تۇرىندە قالاداعى بارلىق مەكتەپتەردە جالعاساتىنىن ايتادى.

«ەلىمىزدە سىبايلاس جەمقورلىققا قارسى ءبىرشاما جۇمىستار اتقارىلىپ جاتىر. سونىڭ ءبىرى - ەلەكتروندىق ۇكىمەت پورتالى بۇل پورتالدا قاراپايىم حالىققا 400 دەن استام قىزمەت كورسەتىلەدى. تيىمدىلىگىن ايتاتىن بولساق، ۇيدەن شىقپاي- اق ساناۋلى مينۋتتاردا جۇزدەگەن قىزمەت تۇرلەرىن الا الادى»، - دەدى و ق و مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى ءالي كومەكبايەۆ.