شىعىس قازاقستاندا ەكى ەت وڭدەۋ زاۋىتى سالىنادى

None
None
استانا. قازاقپارات - شىعىس قازاقستان وبلىسىندا ەت جانە ەت ونىمدەرىن وڭدەيتىن ەكى كومبينات سالىنادى.

وتكەن جىلدىڭ قورىتىندىسى بويىنشا وبلىستا %105 وسىممەن 270 مىڭ توننا ەت ءوندىرىلدى، بۇل رەسپۋبليكالىق ۇلەستىڭ %15. ناتيجەسىندە، شىعىس قازاقستان ەل ىشىندە ەكىنشى ورىندا تۇر. بۇل تۋرالى تۇرعىندار الدىنداعى ەسەبىندە ءوڭىر باسشىسى دانيال احمەتوۆ ايتتى.

وبلىستىڭ ەكونوميكالىق دامۋ دەڭگەيىنىڭ باسىم باعىتتارىنىڭ ءبىرى - اگرارلىق سەكتور. ماسەلەن، ەكسپورت الەۋەتىن ارتتىرۋ ءۇشىن ايماق مال شارۋاشىلىعىن دامىتۋدىڭ كەشەندى باعدارلاماسىن ىسكە اسىرۋدا. ال ەت ءوندىرۋ جانە وڭدەۋ ءىسى ءوڭىر ەكسپورتىن الدىڭعى قاتارعا باستاۋى ءتيىس.

«ەڭ باستىسى، باسەكەلەستىككە باستار مۇمكىندىكتەردى پايدالانا وتىرىپ، ارتىقشىلىقتاردى ءتيىمدى قولدانۋ. سوندىقتان جوعارى ساپالى دايىن ونىمدەر نارىعىنا شىعۋ ءۇشىن «ەۆرازيا اگروحولدينگ» جشس اۆستراليالىق كومپانياسىمەن تىزە قوسىپ، اياگوز اۋدانىندا ەت وڭدەيتىن كومبينات سالۋ جۇمىستارى جۇرگىزىلۋدە. بۇدان بولەك، ءبىزدىڭ تاراپتان نىسانعا 468 ملن تەڭگەگە بارلىق قاجەتتى ينفراقۇرىلىم جۇرگىزىلىپ، جوبالىق-سمەتالىق قۇجاتتاما ازىرلەنىپ جاتىر»، - دەدى ش ق و اكىمى.

سونداي-اق ايماق باسشىسىنىڭ باسپا ءسوز قىزمەتىنەن ءمالىم ەتكەندەي، بۇگىندە «اگروپورتال» ج ش س يراندىق كومپانيانىڭ قاتىسۋىمەن سەمەيدە ەت وڭدەۋ كومبيناتىنىڭ قۇرىلىسى بويىنشا ءىرى ينۆەستيسيالىق جوبانى جۇزەگە اسىرۋعا دايىن. وسى رەتتە وتكەن جىلدىڭ سوڭىندا ق ر ي د م ينۆەستيتسيالار كوميتەتى مەن «اگروپورتال» ج ش س اراسىندا ينۆەستيسيالىق كەلىسىمشارتقا قول قويىلعاندىعىن اتاپ وتكەن ءجون.

سونىمەن قاتار شىعىس قازاقستاندا حالىقارالىق ستاندارتتار بويىنشا اۋىل شارۋاشىلىعى ونىمدەرىن سۇرىپتاۋدىڭ بۇكىل جيىنتىعىن جۇزەگە اسىراتىن زەرتحانا اشىلادى. ايماق باسشىسىنىڭ ايتۋىنشا، «قىتايلىق ستاندارتتار بويىنشا سەرتيفيكاتتاۋ - اسپاناستى ەلىنىڭ نارىعىنا اپاراتىن توتە جول».

«ءبىز ءۇشىن قىتاي نارىعى ماڭىزدى. قازىرگى كۇنى وبلىستا قازاقستاندىق ونىمدەردى قىتايلىق ستاندارت بويىنشا سەرتيفيكاتتاۋ زەرتحاناسىن قۇرۋ جۇمىستارى جۇرگىزىلۋدە. وسى ماسەلە بويىنشا بيىل قاڭتاردا قىتاي حالىق رەسپۋبليكاسىنان ءبىر توپ ماماندار ءبىزدىڭ وبلىسقا كەلىپ قايتتى. زەرتحانانى ورنالاستىراتىن عيمارات دايىندالۋدا. قۇنى ميللياردتان استام تەڭگە بولاتىن قوندىرعىنى جەتكىزۋ جۇمىسىن قازان ايىندا باستايمىز»، - دەدى ايماق باسشىسى.

ايتا كەتۋ كەرەك، بۇل زەرتحانا ەلدەگى بىرەگەي ورتالىق بولماق.

سوڭعى جاڭالىقتار