وتىراردى قورعاۋ انيماتسيالىق فيلمى كورەرمەنگە جول تارتتىم - فوتو

شىمكەنت. قازاقپارات - وڭتۇستىك قازاقستان وبلىسىندا «وتىراردى قورعاۋ» اتتى انيماتسيالىق فيلم كورەرمەنگە جول تارتتى.

تۇساۋى كەسىلگەن تۋىندى ەلباسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا وبلىس اكىمى جانسەيىت تۇيمەبايەۆتىڭ يدەياسىمەن دايىندالعان، دەپ حابارلايدى قازاقپارات ءتىلشىسى.

قازاق حالقىنىڭ تاريحىنان سىر شەرتەتىن شىعارمانىڭ سالتاناتتى تۇساۋ كەسەر راسىمىنە وبلىس اكىمى، زيالى قاۋىم وكىلدەرى مەن تۇرعىندار قاتىستى. جيىندا ءسوز العان ايماق باسشىسى ءفيلمدى دايىنداۋداعى ماقساتىنا توقتالدى.

«مەملەكەت باسشىسى «مادەني قازىنالارىمىزدى الەم جۇرتشىلىعىنا تانىستىرۋدىڭ مۇلدەم جاڭا تاسىلدەرىن ويلاستىرۋ كەرەك. مادەني ونىمدەرىمىز تەك كىتاپ تۇرىندە ەمەس، ءارتۇرلى مۋلتيمەديالىق تاسىلدەرمەن دە شىققانى ابزال» دەگەن بولاتىن. بۇل تاپسىرما وڭىرىمىزدە ءتيىستى دەڭگەيدە اتقارىلىپ كەلەدى. مىنە، «وتىراردى قورعاۋ» انيماتسيالىق ءفيلمى وسىنىڭ دالەلى»، - دەدى جانسەيىت تۇيمەبايەۆ.

2D، 3D فورماتىندا جاسالعان تۋىندى وڭىردەگى تۋريزم سالاسىن دامىتۋ مەن وتىرار توبەنىڭ مارتەبەسىن كوتەرۋگە، شەتەل ازاماتتارىنىڭ قىزىعۋشىلىعىن ارتتىرۋعا جانە كونەدەن كەلە جاتقان اڭىز- اڭگىمەلەردى ناسيحاتتاۋعا، سونداي-اق كورەرمەندەردى پاتريوتيزمگە باۋلۋعا باعىتتالعان.

انيماتسيالىق فيلمدە اتى اڭىزعا اينالعان كونە وتىرار قالاسىنىڭ تۇرمىس-تىرشىلىگى مەن مادەنيەتى ەلىن سۇيەتىن ەكى بالانىڭ باستان كەشكەن حيكايالارى ارقىلى سۋرەتتەلەدى. شىعارمانى تاماشالاعان كورەرمەن الەمدەگى ەكىنشى كىتاپحانا اتانعان وتىرار كىتاپحاناسى مەن ءابۋ ناسىر ءال-فارابي تۋرالى تولىق ماعلۇماتتارعا قانىعادى. سونداي-اق جاۋدى كۇشپەن عانا ەمەس، اقىلمەن دە جەڭۋگە بولاتىنىن تۇسىنگەن بالالاردىڭ ەرلىگى باياندالادى.

انيماتسيالىق فيلمنىڭ رەجيسسەرى ءارى باس سۋرەتشىسى - ازامات ەرنازاروۆ، سەناري اۆتورى - باقىتجان قۇلجاباي، مۋزىكاسىن جازعان - رۋسلان شىنىقۇلوۆ، فيلمنىڭ ديرەكتورى - نۇريددين پاتتەيەۆ.

25 مينۋتتىق انيماتسيالىق ءفيلمنىڭ العاشقى كورسەتىلىمىنەن كەيىن، وبلىس اكىمى جوباعا اتسالىسقان ازاماتتارعا ريزاشىلىعىن ءبىلدىرىپ، ولاردى العىس حاتتارمەن ماراپاتتادى.

ايتا كەتەيىك، بۇل ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ ماقساتىندا وبلىس اكىمىنىڭ تاپسىرىسىمەن تۇسىرىلگەن جالعىز فيلم ەمەس. «ساق» كينوستۋدياسى بۇعان دەيىن «كۇش اتاسى - قاجىمۇقان»، «كيەلى قازىعۇرت» مۋلتفيلمدەرىن جانە «كونە جەتىگەننىڭ سىرى» اتتى 10 سەريالى تەلەحيكايانى دايىنداعان بولاتىن.

بۇدان بولەك، 2018 -جىلى وڭتۇستىك قازاقستان وبلىسى اكىمدىگىنىڭ قولداۋىمەن «تولە ءبي» 10 سەريالى كينوحيكاياسىن، «تۇركىستان»، «وقسىز وقيعاسى»، «ورداباسى - بىرلىكتىڭ تۋى» اتتى انيماتسيالىق فيلمدەرىن ءتۇسىرۋ جوسپارلانۋدا.