قىزىلوردانىڭ وڭتۇستىگىندە داريا مۇزى ەري باستادى: قۇتقارۋشىلار ساقاداي ساي وتىر

None
None
قىزىلوردا. قازاقپارات - سىرداريانىڭ قىزىلوردا قالاسىنىڭ وڭتۇستىك بولىگىندەگى تۇسىندا مۇزدار ەري باستادى. وسىعان بايلانىستى ساقتىق شارالار كۇشەيتىلدى، دەپ حابارلايدى قازاقپارات ءتىلشىسى.

قىزىلوردا وبلىستىق جۇمىلدىرۋ دايىندىعى باسقارماسىنان ءمالىم ەتكەندەي، ۇزىندىعى 171 شاقىرىم بولاتىن قورعانىس بوگەتتەرىنە جوندەۋ جۇمىستارى جۇرگىزىلگەن. سىرداريا جاعاسىنداعى قاۋىپتى ايماقتار قاتاڭ باقىلاۋعا الىنىپ، ارنايى تەحنيكالار مەن جاۋاپتى مەكەمەلەر توتەنشە جاعدايدىڭ الدىن الۋعا ساقاداي- ساي دايىن وتىر. دەگەنمەن، مامانداردىڭ ايتۋىنشا، سەڭنىڭ ۋاقىتىندا جۇرۋىنە اۋا رايىنىڭ قولايسىزدىعى كەدەرگى كەلتىرۋى مۇمكىن.

قازىرگى كۇنى وبلىس اۋماعىنا جوعارى سۋ كوزدەرىنەن سەكۋندىنا 200 تەكشە مەتر سۋ كەلىپ تۇسۋدە. الداعى ۋاقىتتا ونىڭ كولەمى ازايۋى مۇمكىن. دەگەنمەن، بۇل قول قۋسىرىپ وتىرۋعا بولادى دەگەن ءسوز ەمەس.

«بۇگىندە جاڭاقورعان اۋدانىندا مۇز تولىقتاي ەرىپ بولدى دەسەك بولادى. ەندى شيەلى اۋدانىنداعى جاعدايدى باقىلاۋعا الاتىن بولامىز. جالپى، وبلىس اۋماعىندا 95 قاۋىپتى ايماق بار. اۋا رايىنىڭ جاۋىن- شاشىندى بولۋىنا بايلانىستى كەز كەلگەن جاعدايعا دايىن بولۋىمىز كەرەك. بۇل رەتتە، «كوكتەم - 2018» وقۋ- جاتتىعۋى ۇيىمداستىرىلاتىن بولادى. مامانداردىڭ وقىس وقيعا كەزىندەگى ارەكەتتەرىن پىسىقتاماقپىز. جالپى، وزەندەگى جاعداي تۇراقتى»، - دەدى قىزىلوردا وبلىستىق جۇمىلدىرۋ دايىندىعى باسقارماسىنىڭ باسشىسى سەرىك سەرماعامبەتوۆ.

اينۇر تولەشوۆا

سوڭعى جاڭالىقتار