مۇحامەدي ۇلى «پحەنچحان وليمپياداسى تابىستى بولادى» دەگەن ۋادەسىن ءتۇسىندىردى
«باس كەزىندە مەن وليمپيادانىڭ تابىستى بولاتىنىن ايتقانمىن. ەندى، بۇقارالىق اقپارات قۇرالدارى ول تابىس قايدا دەپ، مەنەن سۇراپ ءجۇر. مەن القا ماجىلىسىندە جاۋاپ بەرۋگە ۋادە ەتتىم»، - دەدى ا. مۇحامەدي ۇلى بۇگىن كەڭەيتىلگەن القا وتىرىسىندا.
ءمينيستردىڭ ايتۋىنشا، ول جاڭاعى ءسوزدى ايتقاندا الدىمەن حالىقتىڭ قىزىعۋشىلىعىن وياتۋعا تىرىستى. سودان قازاقستاندىقتار «تابىستى» كۇتىپ، بارلىعى بىردەي ءوز سپورتشىلارىنا جانكۇيەر بولدى.
«ال تابىستىڭ نەگىزگى ءمانى نەدە؟ ءبىز قىسقى وليمپياداعا 57 جولدامانى ۇتىپ الدىق. قازاقستاننىڭ نامىسىن 46 سپورتشى قورعادى. جالپى، جولدامالاردىڭ سانى جاعىنان ءبىز ت م د -دا رەسەيدەن كەيىن ەكىنشى ورىندامىز. وسىنىڭ ءوزى ۇلكەن تابىس ەمەس پە؟ ماسەلەن، وليمپيادانىڭ اشىلۋى كەزىندە قازاقستاندىق سپورتشىلار شىققاندا ءبارى تاڭقالدى. سوسىن الەم بويىنشا ميللياردتاعان ادام جارىستاردى كوردى. ول دا قازاقستان ءۇشىن ۇلكەن جارناما»، - دەپ اتاپ كورسەتتى ا. مۇحامەدي ۇلى.
بۇدان بولەك، ا. مۇحامەدي ۇلى قىسقى جانە جازعى وليمپيادالاردىڭ جەتىستىكتەرىن دە سالىستىردى. ريو وليمپياداسىندا قازاقستان 22- ء ورىننان كورىندى. ال پحەنچحاندا 28- ورىنعا يە بولدى.
«مەملەكەت باسشىسى 2050 -جىلعا دەيىن 30 وزىق ەلدىڭ قاتارىنا كىرۋ مىندەتىن بەلگىلەگەن بولاتىن. ءبىز بولساق، قازىردىڭ وزىندە سپورت جەتىستىكتەرى جاعىنان وتىزدىققا كىرىپ وتىرمىز. ماسەلەن، پحەنچحاندا مەدال سانى جاعىنان نورۆەگيا ءبىرىنشى ورىندى جەڭىپ الدى. ال جازعى وليمپياداعا ولار مۇلدەم قاتىسپايدى. قازاقستان بولسا، ەكى بىردەي وليمپياداعا قاتىسىپ، 30 ۇزدىك ەلدىڭ قاتارىنا كىرىپ وتىر»، - دەيدى مينيستر مۇحامەدي ۇلى.
ونىڭ ايتۋىنشا، پحەنچحان وليمپيداسىنا قاتىسقان قازاقستاندىقتاردىڭ اراسىندا 16-20 جاستاعى سپورتشىلار از ەمەس. ءوزىمىزدىڭ قاراكوز قانداستارىمىز دا كوبەيىپ كەلەدى.
«ءبىز ءبىر رەتتىك تابىس بولسا ەكەن دەپ، جۇمىس ىستەپ جاتقان جوقپىز. 16 جاستاعى سپورتشىلارىمىز بولاشاقتا ۇلكەن جەتىستىكتەرگە جەتە الادى»، - دەپ اتاپ كورسەتتى ا. مۇحامەدي ۇلى.
اۆتور: ارمان اسقاروۆ
