بەرىك ءابدىعالي ۇلى: پرەزيدەنت قازاق حالقىنىڭ ۇلتتىق جاۋاپكەرشىلىگىن ايقىنداپ بەردى

None
None
استانا. قازاقپارات - «قاسيەتتى قازاقستان» عىلىمي- زەرتتەۋ ورتالىعىنىڭ باسشىسى بەرىك ءابدىعالي ۇلى مەملەكەت باسشىسى نۇرسۇلتان نازاربايەۆتىڭ جاريالاعان بەس الەۋمەتتىك باستاماسى تۋرالى پىكىرىن ءبىلدىردى، دەپ حابارلايدى «قازاقپارات» ح ا ا ءتىلشىسى.

«بىرىنشىدەن ايتارىم، ەلباسى ءسوزىنىڭ سوڭىندا ەلدەگى تۇراقتىلىقتى تىلگە تيەك ەتە كەلە، قازاق ۇلتىنىڭ جاۋاپكەرشىلىگى تۋرالى ايتتى. ياعني، مەملەكەت باسشىسى قازاق ۇلتىنىڭ مارتەبەسىن ەرەكشە اتاپ ءوتتى. بۇل - باسقا ۇلتتاردىڭ دارەجەسىن ءتۇسىرۋ دەگەندى بىلدىرمەيدى. ياعني، قازاقستاننىڭ تۇراقتىلىعى ەڭ الدىمەن قازاق ۇلتىنا بايلانىستى. قازاقستانداعى ورىس، ۇيعىر، نەمىس نەمەسە كارىس بولسىن، ءبارىنىڭ ىنتىماعىنا ەڭ ءبىرىنشى قازاقتار جاۋاپتى. ويتكەنى، قازاق ۇلتى وسى ەلدىڭ دە، جەردىڭ دە يەسى. قازاقستاندا ءبارى دە تاتۋ- ءتاتتى ءومىر ءسۇرىپ، ەشكىم ەشكىممەن كيكىلجىڭگە كەلمەۋى كەرەك. ەشكىم دە تەڭسىزدىكتى سەزىنبەۋى ءتيىس. قازاقستانداعى ۇلتتاردىڭ ءبارى دە ءبىر- بىرىنە دوس- باۋىر. سوندىقتان، پرەزيدەنت ءوز سوزىندە قازاقتاردىڭ ۇلتتىق جاۋاپكەرشىلىگىن ايقىنداپ بەردى دەپ ەسەپتەيمىن»، - دەدى بەرىك ءابدىعالي ۇلى.

«قاسيەتتى قازاقستان» عىلىمي- زەرتتەۋ ورتالىعىنىڭ باسشىسى سونىمەن قاتار، الەۋمەتتىك باستامالاردىڭ ماڭىزدىلىعىنا توقتالدى.

«الەۋمەتتىك باستامالاردىڭ قاي- قايسىسى دا ەڭ وزەكتى ماسەلەلەردى قامتىپ وتىر. ەڭ بىرىنشىدەن، تۇرعىن ءۇي ماسەلەسىنىڭ ماڭىزى زور. ءبىزدىڭ ءبارىمىز شەتەلدە ءۇي الۋ كەزىندە پايىز از دەپ جاتامىز. ەندىگى كەزەكتە قازاقستان دا ءۇي الۋ كەزىندەگى پايىزدىق مولشەرلەمەنى 7 پايىزعا ءتۇسىرىپ جاتىر. العاشقى جارنا 20 پايىز بولىپ، 25 جىلعا بولىنە تولەنەتىن ءۇيدىڭ باعاسىمەن كۇنى ەرتەڭ كوپ ادامنىڭ باسپانالى بولۋعا مۇمكىندىگى ارتا تۇسەدى. سوندىقتان، مەنىڭ ويىمشا، بۇل باستامانى حالىق ەرەكشە قۋانا قابىلداعان سەكىلدى. سالىقتى تومەندەتىپ، مەملەكەتتىڭ ء«ار ادامنىڭ تابىسى وزىندە قالسىن» دەگەن ۇستانىمىن دا ايرىقشا اتاپ وتكىم كەلەدى»، - دەيدى ول.

بەرىك ءابدىعالي ۇلى وقۋ بىتىرگەن تۇلەكتەردىڭ ءبىرشاماسى كەيدە وقۋعا تۇسە الماي قينالىپ جاتاتىنىن، وسىعان بايلانىستى بولىنەتىن قوسىمشا 20 مىڭ گرانت ماسەلەنى شەشەتىنىن ەسكە سالدى.

«20 مىڭ ادام قوسىمشا ءبىلىم الۋعا مۇمكىندىك الادى. ۇكىمەت تاعى دا قارجىلاندىرايىن دەپ جاتىر. اسىرەسە تەحنيكالىق ماماندىقتارعا باسا دەن قويىلۋدا. سونىڭ بارىنە 20 مىڭ گرانت ءبولۋ دەگەن - دارىندى جاستاردىڭ جولىن اشادى دەپ بىلەمىن. گرانت ءبولىپ قانا قويماي، جاتاقحانا ماسەلەسى دە نازاردان تىس قالعان جوق. اسىرەسە، وڭىرلەردە تۇراتىن جاستارعا بۇل كەرەمەت مۇمكىندىك. جاتاقحانا تۇرعىزىلسا، بۇكىل جەتىسپەۋشىلىك ماسەلەسى شەشىلەدى. كاسىپپەن اينالىسام دەگەندەرگە قوسىمشا 20 ميلليارد تەڭگە بولىنگەلى وتىر. كاسىبىن باستايمىن دەگەندەرگە بۇل وتە ۇلكەن قولداۋ»، - دەيدى بەرىك ءابدىعالي ۇلى.

بەرىك ءابدىعالي ۇلىنىڭ پايىمداۋىنشا، قالالارعا گاز تارتۋ جۇمىسى باعىتىندا جاسالعان قادامدار ەكولوگيالىق ماسەلەلەردى شەشۋگە ىقپال ەتەدى. قاراعاندى، تەمىرتاۋ، جەزقازعان، استاناعا جەتەتىن گاز باعا تۇرعىسىنان دا حالىققا ىڭعايلى بولىپ كەلەدى.

«ەلباسى الەۋمەتتىك قۇندىلىققا، بىرلىك پەن ادىلەتتىلىككە ءمان بەرىپ وتىر. ياعني، مەملەكەت باسشىسى «رۋحاني جاڭعىرۋمەن» بىرگە، الەۋمەتتىك جاڭعىرۋدىڭ كەزەگى كەلگەنىن ءبىلدىردى. بۇنىڭ ءبارى تۇتاس ۇلتىمىزدىڭ، ەلىمىزدىڭ دامۋىنا سەرپىن بەرەرى ءسوزسىز»، - دەپ ءتۇيدى بەرىك ءابدىعالي ۇلى.

ەسكە سالا كەتسەك، قازاقستان پرەزيدەنتى نۇرسۇلتان نازاربايەۆ پارلامەنت پالاتالارىنىڭ وتىرىسىندا بەس الەۋمەتتىك باستامانى جاريا ەتكەن بولاتىن.

ەل پرەزيدەنتى ءوز سوزىندە «ەل بىرلىگى - ەڭ ءبىرىنشى قازاقتىڭ وزىنە كەرەك» ەكەنىن اتاپ وتكەن ەدى.

«بۇگىنگى باستامالار ەلىمىز تۇتاس، قوعامىمىز تۇراقتى بولعاندا عانا تابىستى جۇزەگە اسادى. وتكەن 26 -جىل تاۋەلسىزدىك ىشىندە ءبىز وسى قاعيدانى ۇستانعاندىقتان عانا بەلەستەردى ەڭسەردىك. ال ەل بىرلىگى - ەڭ ءبىرىنشى قازاقتىڭ بىرلىگى ەكەنىن ايتىپ كەلەمىن. جاھاندىق كوشتىڭ باسىندا جۇرەتىن مەرەيلى ەل بولۋ ءۇشىن بىرلىك پەن ىنتىماق الدىمەن ەلىمىزگە، قازاققا كەرەك»، - دەدى مەملەكەت باسشىسى.

اۆتور: ايان بەكەن ۇلى

سوڭعى جاڭالىقتار