وزگە ۇلتتاردان قۇرىلعان توپ قايرات نۇرتاس پەن ەركەنىڭ اندەرىن ورىندادى - كەسكىن
توپ جونىندە كەڭىرەك ءبىلۋ ءۇشىن «قازاقپارات» ح ا ا ءتىلشىسى ونىڭ سوليسى ماكسيم گولسۆارتپەن سۇحباتتاسقان ەدى.
- ماكسيم، مۋزىكاعا قالاي كەلدىڭىز؟ قانداي اسپاپتاردا ويناي الاسىز؟
- بارلىعى قالاداعى مۋزىكا مەكتەبىنەن باستالدى. مەنى وندا انام الىپ باردى. انامنىڭ كەڭەسىمەن فلەيتا سىنىبىن تاڭدادىم. ول كەزدە 6 جاستا بولاتىنمىن. مىنە، 13 جىل بويى قولىمنان فلەيتا تۇسكەن ەمەس. مۋزىكا مەكتەبىنە تۇسكەن ءار شاكىرت فورتەپيانونى ۇيرەنۋگە مىندەتتى. بۇل اسپاپتى دا مەڭگەردىم.
- ءسىز «ريسۋنكي ۆەتروم» توبىنىڭ مۇشەسىسىز؟ ارىپتەستەرىڭىز تۋرالى ايتا كەتسەڭىز...
- قازىر ءبىز رەپەرتۋاردى تولىقتىرۋ جۇمىستارىمەن بەلسەندى اينالىسۋدامىز. سكريپكاشى ەكاتەرينا پوددۋبنايا جانە گيتاراشى ناتاليا زاكورامەن ءبىر جىل بۇرىن تانىستىق. سول ۋاقىتتان باستاپ توپ قۇرۋعا بەكىندىك.
- قورجىندارىڭىزدا قانداي كومپوزيتسيالار بار؟ قاي اندەردى كوبىرەك ورىندايسىزدار؟
- قازاق، ورىس، شەتەل اندەرى... ءبىز ءبىر جانردى تاڭداپ، سونىمەن جۇرمەيمىز. جۇرتقا ۇناعان اندەردى ورىنداۋعا تىرىسامىز. ارينە، ءوز تۋىندىلارىمىز دا جوق ەمەس.
- ينستاگرام جەلىسىندەگى جەكە پاراقشاڭىزدا جۇمىستارىڭىز تۋرالى ۆيدەوەسەپ بەرىپ وتىراسىز. ءارتۇرلى كومپوزيتسيالاردى بىرىكتىرەتىن بەينەجازبا جاساۋ قانشالىقتى قيىن؟
- مەن جەكە پاراقشامدا ءوزىمنىڭ جەكە جۇمىستارىمدى جاريالاپ وتىرامىن. ال فلەيتا پارتيالارى مەن بيتبوكستى بولەك جازىپ، ارنايى باعدارلامانىڭ كومەگىمەن مونتاجدايمىن. كەيىن تولىققاندى ۆيدەو شىققان سوڭ، الەۋمەتتىك جەلىگە سالامىن.
- جاقىندا ءسىز فلەيتامەن ەركە ەسماحاننىڭ ءانىن ورىنداپ، كوپ قارالىم جينادىڭىز. رەپەرتۋارىڭىزدا باسقا قانداي قازاق اندەرى بار؟
- مەنىڭ ورىنداۋىمداعى ەركەنىڭ «قايدا؟» ءانى تانىمال بولادى دەپ ويلاعان جوقپىن. بالكىم، قازىر بۇل ءان حيتكە اينالعاندىقتان شىعار. مۋزىكانت ءۇشىن تىڭدارمانداردىڭ كوڭىلىنەن شىعۋ اسا ماڭىزدى. وسىنى ەسكەرۋ قاجەت.
- توپتىڭ جوسپارلارى تۋرالى ايتساڭىز. تىڭدارماندى قانداي جاڭالىقتارمەن قۋانتپاقسىزدار؟
- بۇگىندە «ريسۋنكي ۆەتروم» توبىمەن قازاق اندەرىن ورىنداۋ ۇستىندەمىز. اسىرەسە، قايرات نۇرتاس، ەركە ەسماحان سىندى تانىمال انشىلەردىڭ شىعارماشىلىعىن تاڭدادىق. دامۋ ءۇشىن ءالى كوپ جۇمىس ىستەۋ قاجەت. باستىسى، تىڭدارماننىڭ جاقسى باعاسىن الۋ.
اۆتور: قاسقىرباي قويشىمانوۆ
