دومبىرالارىن ارقالاعان قازاق جاستارى گولليۆۋدتا ونەر كورسەتەدى

استانا. قازاقپارات - قازاق دومبىراسىن الەمگە تانىتۋدى ماقسات ەتكەن «باستاۋ» توبى گولليۆۋدتا وتەتىن الەمدىك شوۋعا قاتىسۋعا جولداما جەڭىپ الدى.

بۇل تۋرالى قازاقپارات تىلشىسىنە توپتىڭ پروديۋسەرى الپامىس ءشارىموۆ ايتتى.

ءمالىم بولعانداي، 4 -ناۋرىز كۇنى لاتۆيا استاناسى ريگادا «ۆوسحودياشيە زۆەزدى» حالىقارالىق بايقاۋى ءوتتى. وندا «باستاۋ» دومبىراشىلار توبىنىڭ مۇشەلەرى - قازاق ۇلتتىق ونەر ۋنيۆەرسيتەتىنىڭ ستۋدەنتتەرى تەمىرلان ولجاباي مەن ەرنات ناۋرىز وزگە مۋزىكالىق اسپاپتاردى ارتتا قالدىرىپ، باس جۇلدەنى جەڭىپ الدى.

«نەگىزى بۇل كلاسسيكالىق مۋزىكالىق اسپاپتار بايقاۋى ەدى. الايدا، ءبىز قازاقتىڭ ۇلتتىق مۋزىكا اسپابى - دومبىرانى قاتىستىرۋعا ءوتىنىش بىلدىردىك. ءوتىنىشىمىز قابىل بولدى، ءبىز كۇتپەگەن ەدىك»، - دەدى پروديۋسەر.

الپامىس ءشارىموۆتىڭ ايتۋىنشا، دومبىراشىلار بايقاۋدا «كۇي تارتىس» جانە «ەۆرازيا» كۇيلەرىن ورىنداعان. قورىتىندىسىندا، قازاقستاندىق مۋزىكانتتار گولليۆۋدتا وتەتىن ۇلكەن الەمدىك شوۋعا قاتىسۋ مۇمكىندىگىنە يە بولدى.

«قازاق ۇلتتىق ونەر ۋنيۆەرسيتەتىنىڭ رەكتورى ايمان قوجابەك قىزى مۇساقوجايەۆاعا العىس ايتقىمىز كەلەدى. قازاق ونەرىنىڭ دامۋى ءۇشىن ءارقاشان قولداۋ كورسەتىپ وتىرادى. توپتىڭ وسى بايقاۋعا قاتىسۋىنا بارلىق جول شىعىندارىن ءوز موينىنا الدى»، - دەپ اتاپ ءوتتى ءشارىموۆ.

«ۆوسحودياشيە زۆەزدى - 2018» مۋزىكالىق اسپاپتار مەن ۆوكاليستەر كونكۋرسى 26 -اقپان - 4 -ناۋرىز كۇندەرى ارالىعىندا لاتۆيا استاناسى ريگا قالاسىندا ءوتتى. بايقاۋعا 30 جاسقا دەيىنگى جاستار جانە بالالار قاتىستى.

ايتا كەتەيىك، «باستاۋ» توبى 2017 -جىلى قۇرىلىپ، ءانشى ديماش قۇدايبەرگەننىڭ استانا قالاسىندا وتكەن «باستاۋ» كونسەرتىندە تۇساۋى كەسىلگەن بولاتىن.