پۋتين ماسكەۋدە جاقتاستارى الدىندا ءسوز سويلەدى

استانا. قازاقپارات - رەسەي پرەزيدەنتى ۆلاديمير پۋتين سەنبى كۇنى ماسكەۋدە «كۇشتى رەسەي ءۇشىن» ميتينگ- كونسەرتى وتكەن لۋجنيكي ستاديونىنا جينالعان قالىڭ جۇرت الدىندا ءسوز سويلەدى.

رەسەي پرەزيدەنتتىگىنە كانديداتتىڭ سايلاۋالدى شتابى ۇيىمداستىرعان اكسيادا پۋتين ەسترادا انشىلەرى جانە سپورتشىلارمەن بىرگە رەسەي ءانۇرانىن ايتتى. ۇيىمداستىرۋشىلار كونسەرتتى كورۋگە جينالعاندار سانى ءجۇز مىڭ ادامنان كوپ دەيدى. «ەحو موسكۆى» اقپارات قۇرالى پۋتين سويلەپ بولعان سوڭ كوپ ۇزاماي كورەرمەندەردىڭ كوپشىلىگى تاراي باستاعانى، تريبۋنالاردا پرەزيدەنتتىككە كانديداتتى قولداۋ مازمۇنىنداعى پلاكاتتار قالعانى تۋرالى حابارلادى.

ستاديوندى كۇزەتكەن پوليتسيا وكىلدەرى جۋرناليستەرگە اكسياعا «ەكى ءجۇز مىڭعا جۋىق ادام قاتىستى» دەپ حابارلادى. كەيىن ىشكى ىستەر مينيسترلىگى جيىنعا 130 مىڭ ادام جينالعانى تۋرالى مالىمدەدى. لۋجنيكي ستاديونى تريبۋنالارىنا شامامەن 80 مىڭ كورەرمەن سيادى دەپ حابارلايدى ازاتتىقتىڭ ورىس قىزمەتى.

وۆد-ينفو سايتىنىڭ دەرەگى بويىنشا، سەنبى كۇنى پۋتيندى قولداۋ ميتينگىسى وتكەن ستاديونعا كەلگەن بىرنەشە ادامدى پوليتسيا ۇستاعان. ولاردىڭ اراسىندا رەسەي ورتالىق سايلاۋ كوميسسياسى 18- ناۋرىزعا تاعايىندالعان پرەزيدەنت سايلاۋىنا كانديدات رەتىندە تىركەۋدەن باس تارتقان سوڭ رەسەيلىكتەردى «سايلاۋعا بويكوت جاريالاۋعا» ۇندەگەن وپپوزيتسيالىق ساياساتكەر الەكسەي ناۆالنىيدىڭ جاقتاستارى دا بولعان. كەيىن پوليتسيا ۇستالعانداردىڭ ءبارىن بوساتقان.

«ازاتتىق»