وزبەكستان پروكۋراتۋراسى كاريموۆتىڭ ەكس- كەڭەسشىسى ۇستالعانىن حابارلادى

«باس پروكۋراتۋرا وزبەكستان زاڭناماسى تالاپتارىنا سايكەس، تەرگەۋ ورگانى الدىن الا تەرگەۋ ءوندىرىسى كەزىندە قىلمىستىق ىستەگى مالىمەتتەردى تۇتاسىمەن نەمەسە ولاردىڭ ءبىر بولىگىن جاريالاۋعا جاتپايدى دەپ تانۋعا قۇقىلى ەكەنىن تۇسىندىرەدى»، - دەلىنگەن رەسمي حابارلامادا.

2017-جىلعى تامىزدىڭ 2 ءى كۇنى ۆيدەوبايلانىس ارقىلى وتكەن سەلەكتورلىق جيىندا وزبەكستان پرەزيدەنتى شاۆكات ميرزيايەۆ تاشكەنت وبلىسى پروكۋرورى جامشيد فايزيەۆتى «ءبىرىنشى ۇرى» دەپ اتاعاننان كەيىن ول قىزمەتىنەن بوساتىلعان. فايزيەۆ 2013-جىلى سول كەزدەگى پرەزيدەنت يسلام كاريموۆتىڭ كەڭەسشىسى بولىپ توعىز اي قىزمەت ىستەپ، قۇقىق ورگاندارى مەن باقىلاۋشى قۇرىلىمداردىڭ جۇمىسىن ۇيلەستىرگەن. 2008-جىلى وزبەكستان تاۋەلسىزدىگىنىڭ 17 جىلدىعىنا وراي «مەحنات شۋحراتي» وردەنىمەن ماراپاتتالعان.

وزبەكستان باس پروكۋراتۋراسىنىڭ سايتىندا جاريالانعان اقپاراتتا ۋلۋگبەك سۋنناتوۆ پەن جامشيد فايزيەۆتىڭ بۇرىنعى باس پروكۋرور راشيد قادىروۆتىڭ ءىسى بويىنشا ۇستالعانى ايتىلعان. بۇعان دەيىن باس پروكۋراتۋرا اقپاننىڭ 23-كۇنى تۇتقىندالعان قادىروۆقا «بوپسالاۋ»، «بيلىكتى نەمەسە قىزمەت لاۋازىمىن تەرىس پايدالانۋ» جانە «پارا الۋ» ايىپتارى تاعىلىپ، تەرگەۋ ءجۇرىپ جاتقانى تۋرالى حابارلاعان.

راشيد قادىروۆ 2000-2015-جىلدارى وزبەكستان باس پروكۋرورى قىزمەتىن اتقارعان، كەيىن كونستيتۋتسيالىق سوتتىڭ سۋدياسى بولىپ سايلانعان.

«ازاتتىق»