قىزىلوردا مەكتەبىندە ۇلت اسپاپتار وركەسترى قۇرىلدى
جەرگىلىكتى كاسىپكەر ۇيىرمەگە 10 دومبىرانى سىيعا تارتتى، دەپ حابارلايدى قازاقپارات ءتىلشىسى.
«رۋحاني جاڭعىرۋ» ورتالىعىنىڭ ماماندارى جاقىندا اتالمىش مەكتەپتە ارنايى شارا وتكىزىپ، وندا قازانعاپ اتىنداعى مۋزىكالىق كوللەدج ستۋدەنتتەرى مەن قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ جىرشىلارى ونەر كورسەتتى. كونسەرتتىك باعدارلامادان كەيىن وقۋشىلار مۋزىكالىق ونەرگە ۇلكەن قىزىعۋشىلىق تانىتىپ، ۇلتتىق اسپاپتار وركەسترىن قۇرۋ جونىندە ۇسىنىس بىلدىرگەن. ۇسىنىس قولداۋ تاۋىپ، بالالار ونەر ۇجىمىنىڭ تۇساۋى كەسىلدى.
«ق. مۇحامەدجانوۆ اتىنداعى 1№ مەكتەپ-گيمنازياعا 10 ۇكىلى دومبىرا سىيعا بەرىلدى. ءبىزدىڭ ءوتىنىشىمىزدى قابىل العان كاسىپكەر بالتاباي يبرايەۆ پەن «قولونەر» ورتالىعىنىڭ شەبەرلەرى 10 دومبىرانى اينالاسى ءبىر اپتادا جاساپ شىعاردى. مەكتەپ ديرەكتورى دانابەك ءابدرايموۆ بولسا وقۋشىلارعا كۇي تارتۋدى ءوزى ۇيرەتۋگە كىرىسكەن. ءسويتىپ مەكتەپتىڭ 100 جىلدىق مەرەيتويى قارساڭىندا ۇلتتىق اسپاپتار وركەسترى قۇرىلدى. وعان قوسا، مەكتەپتە «رۋحاني جاڭعىرۋ» كابينەتى اشىلدى»، - دەيدى وبلىستىق «رۋحاني جاڭعىرۋ» ورتالىعىنىڭ ءبولىم باسشىسى گۇلميرا اشىربەكوۆا.
