اقتوبەدە بالاسى مەكتەپتە ورامال تاعاتىن اتا- انالارعا ايىپپۇل سالىندى

None
None
اقتوبە. قازاقپارات - اقتوبەدە مەكتەپكە ورامالمەن باراتىن وقۋشىلاردىڭ اتا- انالارىنا ايىپپۇل سالىندى. قازىرگى كەزدە 44 وقۋشى ورامال تارتىپ ءجۇر، دەپ حابارلايدى قازاقپارات ءتىلشىسى.

 اقتوبە قالاسىنىڭ ءبىلىم ءبولىمى ءدىن جولىنداعى اتا- انالارمەن كەزدەسىپ، ءتۇسىندىرۋ جۇمىستارىن جۇرگىزىپ جاتىر. ولار ءبىلىم جانە عىلىم مينيسترلىگىنىڭ «ورتا ءبىلىم بەرۋ ۇيىمدارى ءۇشىن مىندەتتى مەكتەپ فورماسىنا قويىلاتىن تالاپتاردى بەكىتۋ تۋرالى» بۇيرىعىنا سۇيەنىپ، مەكتەپ فورماسىن ساقتاماعان وقۋشىلاردىڭ اتا- انالارىنا ايىپپۇل سالدى.

«بالالارى № 40, 49, 13, 36, 62, 23, 8, 60 جانە 48 ورتا مەكتەپتەردە ءبىلىم الاتىن اتا- انالار ديرەكتورلاردى سوتقا بەردى. ولار ارىزدا «بالامدى مەكتەپكە كىرگىزبەدى» دەپ جازعان. ءبىراق اقتوبە قالالىق سوتى مەكتەپ ديرەكتورلارىنىڭ ارەكەتىن زاڭسىز دەپ تانۋ تۋرالى ارىزدارىن قاناعاتتاندىرۋسىز قالدىردى. ءبىلىم سالاسىن باقىلاۋ دەپارتامەنتىندە قازىرگى تاڭدا 17 قۇجات تەكسەرۋ ۇستىندە. بارلىعى 6 قۇجات بويىنشا حاتتاما تولتىرىلىپ، اتا- انالارعا ق ر اكىمشىلىك قۇقىق بۇزۋشىلىق تۋرالى كودەكسىنىڭ 409-بابى 2-تارماقشاسى بويىنشا اكىمشىلىك جازا قولدانىپ، ايىپپۇل سالىندى»، - دەپ حابارلادى اقتوبە قالاسى اكىمدىگىنىڭ باسپا ءسوز قىزمەتى.

اقتوبە وبلىسىنىڭ اكىمى بەردىبەك ساپاربايەۆ ءۇش اي ىشىندە بۇل داۋدى شەشىپ، مەكتەپتەگى ورامال ماسەلەسىن تۇبەگەيلى جويۋدى تاپسىرعان بولاتىن. اقتوبە قالاسى بويىنشا بارلىعى 179 وقۋشى مەكتەپكە ورامالمەن باردى. كەزدەسۋ، ءتۇسىندىرۋ جۇمىستارىنان سوڭ 111 وقۋشى قىز ورامالىن مەكتەپ فورماسىنا اۋىستىرىپ، 21 وقۋشى قىز وتباسىلىق جاعدايلارىنا بايلانىستى باسقا وبلىستارداعى مەكتەپتەرگە اۋىستىرىلدى. ال ءبىر وقۋشى دەنساۋلىق جاعدايىنا بايلانىستى ۇيدە ءبىلىم الىپ ءجۇر. ەكەۋى ۇزاق مەرزىمگە ەمدەلۋگە جىبەرىلدى.

قازىرگى كەزدە اقتوبە قالاسىنداعى ءبىلىم بەرۋ ۇيىمدارىندا 44 وقۋشى ورامال تاعىپ ءجۇر.

اۆتور: التىناي ساعىندىقوۆا

سوڭعى جاڭالىقتار