قۇرىلىسشىلاردىڭ بالالاردى قۇتقارۋ وقيعاسى: «باتىرلار» ماراپاتتالدى

None
None
استانا. قازاقپارات - استاناداعى جاڭا ۇيدەن شىققان ورتتەن ءۇش بالانى قۇتقارعان قۇرىلىسشىلار وزدەرى جۇمىس ىستەيتىن كومپانيا تاراپىنان ماراپاتتالدى، دەپ حابارلايدى قازاقپارات ءتىلشىسى.

«ولار ەش ساقتاندىرۋسىز، كەرەك جابدىقتارسىز بالالاردى قۇتقارۋعا ۇمتىلعان. كومپانيامىزدىڭ اتىنان BI Development باسقارما ءتوراعاسى امانگەلدى وماروۆ ءوز باستارىن قاتەرگە تىگىپ، بالالاردى امان الىپ قالعان كومپانيا قىزمەتكەرلەرى - رۋسلان جالباقوۆ، جاسۇلان بايسەيىتوۆ، اقىلبەك جاقايىموۆ، رۋسلان بەرىكوۆتى جانە ادىلبەك داعىستاندى ماراپاتتاپ، اقشالاي سىياقى بەردى. ءبىزدىڭ قۇرىلىسشىلار وتە ەپتى قيمىلداپ، قۇتقارۋ جۇمىسىن ويداعىداي جۇرگىزدى. بۇل ساتتە Otau Development Group قىزمەتكەرلەرى قۇرىلىسشىلار قۇلاپ كەتپەسىن دەپ، تومەندە برەزەنت جاپپا ۇستاپ تۇردى»، - دەلىنگەن كومپانيا حابارلاماسىندا.

قۇرىلىس كومپانياسىنىڭ باسپا ءسوز حاتشىسى اينۇر ءاشىموۆانىڭ ايتۋىنشا، قۇرىلىسشىلاردى استانالىق اكىمدىك تە ماراپاتتايدى.

ەسكە سالا كەتسەك، كەشە «Nova City» كوپقاباتتى تۇرعىن ءۇي كەشەنىنىڭ 7 قاباتىنان ءورت شىقتى. كورشىلەس عيماراتتى تۇرعىزىپ جاتقان قۇرىلىسشىلار ءورت شىققان پاتەرگە ورمەلەگەن جانە بالالار مەن ايەلدى تەرەزە ارقىلى تومەنگى قاباتقا تۇسىرگەن.

قۇتقارۋ ءساتى تۇسىرىلگەن بەينەجازبا الەۋمەتتىك جەلىدە كەڭىنەن تارالدى. «Nova City» كوپقاباتتى تۇرعىن ءۇي جوباسىمەن Bi Group كومپانياسى قۇرامىنداعى Otau Development Group اينالىسادى.

سوڭعى جاڭالىقتار