ساراپشىلار مۇناي باعاسىنا قاتىستى ويلارىمەن ءبولىستى

استانا. قازاقپارات - الەمدىك ەكونوميكانىڭ قۇرىلىمى قارقىندى.  بۇل جاھاندانۋ ۇدەرىسىمەن بايلانىسى بار بارلىق ەلدەرگە ىقپال ەتىپ وتىر.

 وسى تاقىرىپ بۇگىن الماتىدا وتكەن قارجى سەكتورىنداعى توپ- مەنەدجەرلەردىڭ V سامميتىندە تالقىلاندى. ساراپشىلاردىڭ پىكىرىنشە، بۇگىنگى تاڭدا عالامدىق ەكونوميكا ءار ەلدىڭ ءوز مۇددەسىمەن ۇشتاسا وتىرىپ دامۋى ءتيىس. ويتكەنى حالىقارالىق تاجىريبەلەر، ەرەجەلەر مەن ۇسىنىستار بەلگىلى ءبىر مەملەكەتتىڭ ىشكى ساياساتىنىڭ ۇدەسىنەن شىقپاسا، ونداي اقىل- كەڭەستەردىڭ ماڭىزدىلىعى بولمايدى. سوندىقتان ءتيىمدى ەكونوميكالىق وسىمگە قول جەتكىزۋ ءۇشىن جەكە باعدارلامالار قاجەت.

 ماقسات -  ىشكى ماسەلەلەردى شەشە وتىرىپ، جاھاندىق سىن- قاتەرلەرگە توتەپ بەرۋ. ساراپشىلار قازاقستان ەكونوميكاسىنا قاتىستى دا پىكىرلەرىن ءبىلدىردى. ولاردىڭ ايتۋىنشا، الداعى بىرنەشە جىل بويى شيكىزات باعاسى جاقسى بولادى. «دەگەنمەن ەكونوميكا دا اۋا رايى سەكىلدى قۇبىلىپ تۇرادى. سوندىقتان قازاقستان كەز كەلگەن جاعدايعا دايىن بولۋى كەرەك»، -  دەيدى قارجىگەرلەر.

الماس چۋكين، ەكونوميست:

- ادام كاپيتالىن دامىتۋعا، بىلىمگە، مامانداردى قايتا دايارلاۋعا دەن قويۋ قاجەت. 2030 -جىلى مۇناي ءداۋىرى شارىقتاۋ شەگىنە جەتىپ، ودان كەيىن تومەندەي باستايدى. ءبىز قازىر الەمدىك ەكونوميكانىڭ «جاڭا مۇنايى» اقپارات ەكەنىن كورىپ وتىرمىز. بولاشاقتىڭ ەكونوميكاسىندا اقپاراتتى كىم تەز وڭدەپ، ءتيىستى شەشىم قابىلداي السا، سول جەڭىسكە جەتەتىن بولادى. ءبىز وسىعان دايىندالۋىمىز كەرەك.