ناۋرىزعا وراي قازاقستاننىڭ تانىمال انشىلەرى موڭعوليادا ونەر كورسەتەدى

بايان- ولگەي. قازاقپارات - ناۋرىز مەيرامى قارساڭىندا قازاقستان رەسپۋبليكاسىنىڭ ءبىرقاتار تانىمال انشىلەرى موڭعوليانىڭ استاناسى ۇلانباتىر قالاسىندا جانە قازاقتار كوپ شوعىرلانعان بايان- ولگەي، قوبدا ايماقتارىندا كونسەرتتىك كەشتەرىن وتكىزبەك، دەپ حابارلايدى قازاقپارات.

قازاقستاننىڭ ەڭبەك سىڭىرگەن ونەر قايراتكەرى، ءانشى ءمادينا ءسادۋاقاسوۆا، ءانشى ۇشقىن جامالبەكتەر ناۋرىزدىڭ 14 -16 ارالىعىندا قوبدا، بايان- ولگەي ايماقتارى جانە ۇلانباتىر قالاسىنىڭ ەڭ ۇلكەن كونسەرت زالى «UB palace»- تا جاندى داۋىستا «ارمان ەلىم- اي» ءان كەشىن كورەرمەندەرگە تارتۋ ەتپەك.

 كونسەرتتى 2017 -جىلى ءانشى تورەعالي تورەالىنىڭ «ۇلى دالا بالاسى» كەشىنىڭ موڭعوليادا وتۋىنە مۇرىندىق بولعان تاجىريبەلى توپ «بايار ينتەرتاينمەنت» كومپانياسى ۇيىمداستىرادى. ال بارشا تانىمال انشىلەر ماقسات بازاربايەۆ، سەرجانالى الىبەكتەردىڭ «ەل كوشكەندە» اتتى ءان كەشى ناۋرىزدىڭ 20 - كۇنى موڭعوليانىڭ استاناسى ۇلانباتىر قالاسىندا، 21- كۇنى بايان- ولگەيدە، ناۋرىزدىڭ 22- كۇنى قوبدادا ونەرسۇيەر قاۋىمعا ۇسىنىلماقشى.

 ماقسات پەن سەرجانالىنىڭ ۇلانباتىردا وتەتىن كونسەرتىنە موڭعوليانىڭ روك- پوپ جۇلدىزدارىنىڭ بەلگىلى وكىلدەرى «حۋرد» توبى، «اللو» ءانىن موڭعول تىلىندە شىرقاپ جۇرگەن انشىلەر موڭعوليا مادەنيەت قايراتكەرلەرى ل. ءسورولت، ا. تۇمەن- ءولزيي جانە ت. امينا قاتىسادى دەپ جوسپارلانعان. وعان ۇلانباتىرداعى بايان- ولگەي ايماعىنىڭ جەرلەستەر القاسى مەن قازاق جاستار دامۋ ورتالىعى دەمەۋشىلىك كورسەتەدى.

ال نۇربولات ءابدۋليننىڭ كونسەرتى ايدىڭ 11- كۇنى بايان- ولگەيدە، 12- كۇنى ۇلانباتىر قالاسىندا قويىلادى. وسىلايشا الىستاعى قازاقتىڭ ماۋقىن باسىپ، رۋحىن سەرپىلتىپ، قازاق انىمەن سۋسىنداتۋ ءۇشىن كەلەتىن ونەر جۇلدىزدارىن شالعايداعى قازاقتار اسىعا كۇتۋدە.

قۋات ۋاتحان