ءدىندى ساياساتتىڭ قۇرالىنا اينالدىرماۋىمىز قاجەت - باس ءمۇفتي
«بۇگىنگى تاڭدا الەم قارقىندى تۇردە وزگەرۋدە. ادامگەرشىلىك قاسيەتتەر كوبىنە تاسادا قالىپ جاتقان قازىرگى جاھاندانۋ زامانىندا بويىنا رۋحاني قۇندىلىقتاردى جيناعان جاندار عانا سانا سوعىسىنان امان قالىپ، قاۋىپ قاتەردەن قۇتىلادى. جاڭا زامانداعى ۇردىستەر مەن سىن- قاتەرلەرگە توتەپ بەرۋدىڭ توتە جولى - ءدىنىمىزدىڭ اسىل قۇندىلىقتارى مەن ورەلىك ورنەكتەلگەن ءدىني تانىمىمىزدى قايتا جاڭعىرتۋ. ءبىزدىڭ ءدىني رۋحاني تۇتاستىعىمىزدى قامتاماسىز ەتىپ وتىرعان، ورتاق تاريحىمىز بەن مادەنيەتىمىز بار. ولاي بولسا، سىرتتان كەلىپ جاتقان تاسقىندارعا توتەپ بەرۋ ءۇشىن ەۋرازيا مۇسىلماندارى مادەني جانە رۋحاني ينتەگراتسيانى جانداندىرۋىمىز كەرەك. ءبىز ءوزىمىزدىڭ ءتول ءدىني تۇلعالارىمىزدىڭ ونەگەلەرىن دارىپتەۋىمىز قاجەت. ياعني، تۇلعاتانۋ ىزدەنىستەرىن جۇرگىزىپ، بىرنەشە تىلدە ورتاق حريستوماتيالار مەن وقۋلىقتار شىعارۋ كەرەك دەپ سانايمىن. سونداي- اق، ورتاق تۇلعالاردىڭ جىل سايىن ءداستۇرلى وقۋلارىن جۇيەلى تۇردە ۇيىمداستىرعانىمىز ابزال»، - دەدى باس ءمۇفتي.
بۇدان بولەك ول قازىرگى سىن- قاتەرلەرگە ءتيىستى دەڭگەيدە قارسى تۇرۋ ءۇشىن ەۋرازيا حالىقتارىنىڭ، ەۋرازيا مۇسىلماندارىنىڭ رۋحاني بىرىگۋى تۇجىرىمداماسىن ازىرلەۋدى ۇسىندى. سونىمەن قاتار، ەۋرازيا مۇسىلمان عۇلامالارى فورۋمىنىڭ تۇراقتى حاتشىلىعىن قۇرۋ كەرەكتىگى ايتىلدى. بۇل تۇرعىدا حاتشىلىق ەۋرازيا مۇسىلماندارىنىڭ رۋحاني بىرىگۋى تۇجىرىمداماسىن ازىرلەۋ بويىنشا جۇمىس ورگانى بولماق.
«ءبىز قانداي جاعدايدا دا ءدىندى ساياساتتىڭ قۇرالىنا اينالدىرماۋىمىز قاجەت. قازىرگى الەمدەگى كۇردەلەنگەن ءدىني احۋال ءدىن قىزمەتكەرلەرىنىڭ جاۋاپكەرشىلىگىن ودان سايىن ارتتىرا ءتۇستى»، - دەدى سەرىكباي قاجى وراز.
اۆتور: رۋسلان عابباسوۆ
