استانا اۋەجايى سۋ استىندا قالۋى مۇمكىن
«ەسىل وزەنى ارناسىنىڭ اقمولا وبلىسى اۋماعىنداعى تومەنگى جاعىنان سۋ جىبەرۋ قابىلەتىن ارتتىرۋ بويىنشا قابىلدانىپ جاتقان شارالار بۇگىنگى كۇنى جەتكىلىكسىز بولىپ وتىر. مايبالىق كولى اۋماعىندا ەلوردانىڭ اۋەجايىن سۋ باسۋ قاۋپى ساقتالىپ وتىر. سوندىقتان ارتىق سۋدى بۇرۋ ءۇشىن نىسان سالۋ بويىنشا قاجەتتى شارالار قابىلداۋ تالاپ ەتىلەدى»، - دەدى يۋري يلين ماجىلىستەگى «توتەنشە جاعدايلاردىڭ الدىن الۋ جانە ولاردى جويۋ جونىندەگى مەملەكەتتىك جۇيەنىڭ جاي-كۇيى مەن دامۋ پەرسپەكتيۆالارى تۋرالى» دوڭگەلەك ۇستەل وتىرىسىندا.
سونىمەن قاتار ۆيتسە-مينيستر وتكەن جىلى اتباسار قالاسىن سۋ باسقاندىعىنا دا جان-جاقتى توقتالىپ ءوتتى. ونىڭ ايتۋىنشا، سۋدىڭ دەڭگەيى 590 ميلليون تەكشە مەترگە جەتىپ، قورعانىس قۇرىلعىسىن بۇزىپ كەتكەن.
«قازىرگى ۋاقىتتا ەلىمىزدىڭ بۇكىل اۋماعىنداعى يەسىز گيدروتەحنيكالىق قۇرىلعىلار پروبلەماسى شەشىلىپ جاتىر. ولاردىڭ سانى 46 عا جۋىقتايدى. باسىم بولىگى الماتى مەن ماڭعىستاۋ وبلىستارىنىڭ اۋماعىندا ورنالاسقان. اتالعان وڭىرلەردە 13 تەن قاراۋسىز قۇرىلعىلار بار»، - دەدى ول.
