شىعىس قازاقستاندا وقۋشىنىڭ تاۋدان سىرعاناپ مەرت بولۋىنا قاتىستى قىلمىستىق ءىس قوزعالدى

None
None
وسكەمەن. قازاقپارات - وسكەمەننىڭ ىرگەسىندەگى «نۇرتاۋ» شاڭعى بازاسىندا 17 جاستاعى قىزدىڭ قايتىس بولۋىنا بايلانىستى قىلمىستىق ءىس قوزعالدى، دەپ حابارلايدى قازاقپارات ءتىلشىسى.

سىرعاناق تەۋىپ جۇرگەن وقۋشىلاردىڭ ءبىرى رەزەڭكە باللوننان اۋناپ، سوڭى قايعىلى وقيعامەن اياقتالدى.

 «نۇرتاۋ» ۇجىمى مارقۇمنىڭ تۋىستارى مەن جاقىندارىنا قايعىرا كوڭىل ايتادى. وكىنىشكە وراي، قىزمەتكەرلەردىڭ ەسكەرتۋى مەن تىيىم سالعان بەلگىلەرگە قاراماستان، ەكى سىنىپتاس رۇقسات ەتىلمەگەن جەردەن سىرعاناعان. رەزەڭكە باللونمەن سىرعاناۋ ءۇشىن بازا دا ارنايى جول توسەلگەن. ال بۇلار شاڭعىنىڭ جولىمەن تۇسپەك بولعان. جاراقات العان قىز ارنايى تاسىمالداعىشپەن تومەنگە ءتۇسىرىلىپ، كەزەكشى دارىگەر شاقىرىلدى. ءبىراق ونى قۇتقارىپ قالۋ مۇمكىن بولمادى. قازىر بازادا تەرگەۋ جۇمىستارى ءجۇرىپ جاتىر» دەلىنگەن دەمالىس ورنىنىڭ «ينستاگرامداعى» پاراقشاسىندا.

قايعىلى وقيعا كەشە بولعان. بۇگىن وسىعان بايلانىستى وسكەمەن قالاسىنىڭ ءبىلىم ءبولىمى مالىمەت تاراتتى.

 «نۇرتاۋعا» ساياحاتتى №32 مەكتەپ دەنساۋلىق كۇنىنە وراي ۇيىمداستىرعان. اتا- انالاردىڭ ءوتىنىشى بويىنشا مەكتەپ باسشىلىعى ساياحاتقا رۇقسات بەرگەن بولاتىن» - دەلىنگەن ول اقپاراتتا.

 21 وقۋشى مىنگەن اۆتوبۋس مەكتەپتەن تاڭعى ساعات 9.00-دە شىققان. قاستارىندا سىنىپ جەتەكشىلەرى مەن اتا- انالار كوميتەتىنىڭ وكىلدەرى بولعان. قايعىلى جاعداي تۋرالى مالىمەت مەكتەپ ديرەكتورىنا 10.53-تە ايتىلىپتى.

بۇل وقيعا وبلىستىق ىشكى ىستەر دەپارتامەنتىنىڭ باقىلاۋىنا الىندى.

«وسى وقيعاعا بايلانىستى ق ر قىلمىستىق كودەكسىنىڭ 141-بابى بويىنشا سوت الدى تەرگەۋ جۇمىستارى ءجۇرىپ جاتىر. اتالمىش باپ بالالاردىڭ ءومىرى مەن دەنساۋلىق قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماۋ فاكتىلەرىن قامتيدى. وقۋشىلار سىرعاناق تەبۋگە ارنالماعان جولمەن تۇسكەن. وعان قالاي جول بەرىلگەنىن تەرگەۋ شارالارى انىقتايدى» - دەيدى ءى ءى د باسپا ءسوز قىزمەتى.

 مارقۇمنىڭ جانىندا بولعان وقۋشىنىڭ قولى سىنعان. قازىر ول ۇيىندە.

فوتو: fsmsolicitors.co.uk

اۆتور: ەسىمجان ناقتىباي

سوڭعى جاڭالىقتار