ماجارلار بەرەل قورىمىنا ءتاۋ ەتپەك
اتالمىش ساپار بيىلعى ماۋسىم ايىنا جوسپارلانىپ وتىر. ەكسپەديتسيانى ۇيىمداستىرۋشى «ەۋرازيالىق بىرلىك ءۇشىن» قوعامدىق قورىنىڭ پرەزيدەنتى يشتۆان بەنتسە وبلىس اكىمى دانيال احمەتوۆپەن كەزدەسۋىندە وسىلاي دەدى.
«استانادان قاراقورىمعا دەيىن» دەپ اتالاتىن بۇل ساپار «الماتىدان ماجارستانعا دەيىن» جانە «بۋداپەشتەن استاناعا دەيىن» اتتى ەكسپەديتسيالاردىڭ جالعاسى بولماق. يتۆان بەنسەنىڭ باسشىلىعىمەن ءۇش ادامدىق توپ ەجەلگى عۇندار سياقتى كيىنىپ، جولدىڭ باسىم بولىگىن سالت اتپەن ءجۇرىپ وتپەك.
«بۇل وسىدان ونداعان عاسىر بۇرىن شىعىستان باتىسقا قاراي قونىس اۋدارعان اتا- بابالارىمىزدىڭ باسىنان وتكەرگەنىن سەزىنۋ ءۇشىن جاسالىپ وتىر»، - دەيدى ماجارستاندىق ساياحاتشى.
كەزدەسۋ بارىسىندا ماجارستاندىق مەيمان وبلىس اكىمىنە ەكسپەديتسيا ءجۇرىپ وتەتىن مارشرۋتتى دا تانىستىردى. ونىڭ ايتۋىنشا، استانادان شىققان ساياحاتشىلار ەرەيمەنتاۋ، ەكىباستۇز، پاۆلودار، سەمەي، وسكەمەن، ۇلكەن نارىن، قاتونقاراعاي سياقتى ۇلكەندى- كىشىلى ەلدى مەكەندەردە ايالداپ، بەرەل قورىمىنداعى پروتوتۇركىلەردىڭ قورىمىنا ءتاۋ ەتپەك. بۇدان كەيىن ول موڭعولياعا جول تارتادى.
«اتا- بابالارىمىز عۇندار سياقتى جولدىڭ نەگىزگى بولىگىن ات ۇستىندە ءجۇرىپ وتپەكپىز. ساپارىمىزدى باستان- اياق بەينەكامەراعا ءتۇسىرىپ وتىرامىز دەپ شەشتىك. وسى ارقىلى ءبىر- ءبىرىمىزدى جاقىنىراق تاني تۇسەمىز، ەكى ەل اراسىنداعى مادەني، رۋحاني بايلانىستى نىعايتۋعا شاما- شارقىمىزشا ۇلەسىمىزدى قوسامىز دەپ ۇمىتتەنەمىن» - دەگەن يشتۆان بەنتسە.
جالپى، بەس جىل ىشىندە سالت اتتى ساياحاتشىلار ماجارستان، بولگاريا، گرۋزيا، سەربيا، ازەربايجان، تۇركيا، وزبەكستان، تۇرىكمەنستان، رەسەي، موڭعوليا، قىتاي مەن وڭتۇستىك كورەيا ەلدەرىن اتپەن ارالاپ شىقپاق.
اۆتور: ەسىمجان ناقتىباي
