استانادا جارىق ءجيى ءسونىپ قالادى - يسەكەشەۆ سەبەبىن ايتتى

None
None
استانا. قازاقپارات - ەلوردا باسشىسى اسەت يسەكەشەۆ جارىقتىڭ ءسونىپ قالۋى بويىنشا مىڭعا جۋىق جاعدايعا نە تۇرتكى بولعانىن ءتۇسىندىردى، دەپ حابارلايدى «قازاقپارات» ح ا ا ءتىلشىسى.

«وتكەن جىلى جارىقتىڭ اپاتتىق ءسونىپ قالۋىنا قاتىستى 956 جاعداي تىركەلدى. ونىڭ ءبىر بولىگى ءبىزدىڭ «استانا-رەك» سالدارىنان بولعانىن مويىندايمىز. ءاربىر جاعداي بويىنشا ءبىز تەكسەرىس جۇرگىزىپ، ءبىرقاتار قىزمەتكەرلەر لاۋازىمىنان بوساتىلدى. وسىنىڭ ارقاسىندا قىركۇيەك ايىنان باستاپ جاعدايدىڭ ايتارلىقتاي جاقسارعانىن بايقاپ وتىرمىز. ءبىراق، جارىقتىڭ ءسونىپ قالۋى وسى سالاداعى ۇيىمدار مەن جەكە قۇرىلىس كومپانيالارىنىڭ بىلىكسىزدىگى ءتيىمسىز جۇمىسى سەبەپ بولىپ وتىر»، - دەدى قالا اكىمى.

ونىڭ ايتۋىنشا، اپاتتىق جارىقتى ءسوندىرۋدىڭ سەبەبى ىشكى جەلىلەرگە بايلانىستى بولعان.

«بىزگە شاعىم كەلىپ تۇسكەن كەزدە ماماندارىمىز «بۇل ءبىزدىڭ نىساندار ما، الدە جەكە مە؟» دەپ سۇراپ جاتپايدى. ءبىز قوڭىراۋ تۇسكەن ۇيلەرگە بارىپ، جارىقتى قوسىپ بەرەمىز. ءبىراق، سونىمەن قاتار، جۇمىستىڭ ساپاسى پەن پايدالانىلۋىنا باسقارۋشى كومپانيالار، پيك جاۋاپتى. ءبىز ولارمەن دە بىرلەسە جۇمىس جۇرگىزەمىز»، - دەدى شاھار باسشىسى.

اسەت يسەكەشەۆ ءوز سوزىندە قالاعا جارىق بەرۋ جۇيەسىن دامىتۋ بويىنشا اكىمدىكتىڭ جوسپارىمەن ءبولىستى.

«وتكەن جىلى «تۇران»، «جاڭاجول»، «بايتەرەك»، «ەكى»، «پرومزونا» كىشى ستانسالارىنىڭ قۇرىلىسى مەن قايتا جوندەۋ جۇمىستارى اياقتالدى. اپاتتىق جاعدايلاردى ازايتۋ ءۇشىن 81 ءبولۋشى پۋنكتەرگە جوندەۋ جۇرگىزىلگەن. بيىل تاعى 10 ترانسفورماتورلىق كىشى ستانسا جوندەلىپ، 6 جاڭا پۋنكت سالىنادى»، - دەيدى ول.

اۆتور: ايان بەكەن ۇلى

سوڭعى جاڭالىقتار