استانا-ارلانس بوكسشىلارى ناۋقاس بالا ءۇشىن قولعاپتارىن ساتتى

None
None
كوكشەتاۋ. قازاقپارات - «Astana Arlans» بوكس كلۋبىنىڭ بوكسشىلارى بىلعارى قولعاپ ساۋداسىنان تۇسكەن 1,4 ميلليون تەڭگەدەن استام قارجىنى «كوبەلەك سيندرومى» دەرتىمەن ناۋقاس بالا ارتۋر گريشۋكتىڭ اناسىنا تابىس ەتتى، دەپ حابارلايدى قازاقپارات ءتىلشىسى.

اقمولا وبلىسىنىڭ دەنە شىنىقتىرۋ جانە سپورت باسقارماسى باسپا ءسوز قىزمەتىنىڭ دەرەگى بويىنشا، وتكەن دەمالىس كۇندەرى شۋچە قالاسىندا بۇكىلالەمدىك بوكس سەرياسىنىڭ (WSB) 8 ماۋسىمى اياسىندا «Astana Arlans» پەن «Patriot Boxing Team»  بوكس كلۋبتارىنىڭ بوكسشىلارى جەكپە-جەكتەر وتكىزدى. تارتىستى كەزدەسۋدە ارلاندىقتاردى قوناقتاردى 5:0 ەسەبىمەن ويسىراتا ۇتتى.

كەزدەسۋ اياقتالعان سوڭ «Astana Arlans» كلۋبىنىڭ بوكسشىلارى بىلعارى قولعاپتارىن ساتۋ بويىنشا اۋكسيون وتكىزدى. ودان تۇسكەن 1,4 ميلليون تەڭگەدەن استام قارجىنى «كوبەلەك سيندرومى» دەرتىمەن ناۋقاس بالا ارتۋر گريشۋكتىڭ اناسىنا ولگا گريشۋككە تابىس ەتىلدى.

سيرەك كەزدەسەتىن بۇل دەرت ارتۋردىڭ تولىققاندى ءوسىپ، دامۋىنا كەدەرگى كەلتىرۋدە. ىستىعىنىڭ ءجيى كوتەرىلۋى، دەنەسىنىڭ مۇزداپ، السىرەۋىنىڭ سالدارىنان بالا ءتىپتى دالاعا دا شىعا المايتىن كورىنەدى. ارتۋر بىشكەك جانە ماسكەۋ قالاسىنداعى بالانىڭ دەنساۋلىعى ورتالىعىندا تەكسەرىلىپ، ەمدەلگەن. الايدا، ودان ەش ناتيجە شىققان جوق.

«بالامنىڭ اۋىرىپ، قينالىپ جۇرگەنىن كورگەندە انا جۇرەگىم ەكىگە ايىرىلعانداي كۇي كەشەمىن. بالامدى ءبارى جاقسى بولادى، شىدا دەپ ۋاتامىن. دەنەسىندەگى تەرىنىڭ 60-70 پايىزى زاقىمدانعان. كۇنىنە ءار ەكى ساعات سايىن دەنەسىن داكەمەن تانىپ وتىرۋ قاجەت. كۇننەن كۇنگە دەرتى ۋشىعىپ بارادى. قايتسەك تە، جازىلىپ كەتەتىنىنە سەنەمىز. ءبارى جاقسى بولادى، وعان ءبىزدىڭ ەركىمىز بەن قۋاتىمىز جەتەدى»، دەيدى ولگا گريشۋك.

 

سوڭعى جاڭالىقتار