ءبىر ۋىس تارىسى مەن قۇرتىن ءبولىپ بەرگەن قازاق حالقىنا العىس ايتامىز - يننا لي

 دەپ حابارلايدى قازاقپارات ءتىلشىسى.

 قۇدايبەرگەن جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ وقىتۋشىسى يننا لي اكەسى كليمەنتيەۆتىڭ تاعدىرىن كوزىنە جاس الماي ايتا المايدى. كليمەنتيەۆ بار بولعانى 6 جاسىندا اتا- اناسىمەن بىرگە جەر اۋدارىلعان.

 «اكەم ادامدارعا ەمەس، مالعا ارنالعان ۆاگونمەن بىرنەشە اي بويى ءجۇرىپ، قازاق جەرىنە كەلدى. ول ءوز اڭگىمەلەرىندە «جول بويى ادامداردىڭ ءولى دەنەسى تاۋ بولىپ ءۇيىلىپ جاتتى» دەپ ءجيى ايتادى. اشتىقتان، شولدەن كوز جۇمعان ادامداردى ەشكىم جەرلەمەدى. ولاردى تەك ۆاگوننان ىسىرىپ، جەرگە لاقىرىپ تاستاعان. قازاق جەرىنە كەلگەن سوڭ ولارعا جاتىن ورىن، تاماق بەرگەن دە ەشكىم بولمادى. كورەي حالقىن شپيون دەپ اتاپ، ولارعا جاقىنداۋعا تىيىم سالعان. بارلىق كەدەرگىگە قاراماستان قازاق حالقى ءبىزدىڭ اتا- بابامىزعا كومەكتەستى. سول ءۇشىن دە العىسىمىز شەكسىز»، - دەدى يننا لي.

ءدال سول كەزدە جاپونيادا سوعىس بولىپ جاتتى. ال قازاق جەرىنە كەلگەن كورەي حالقىن جاپونداردىڭ شپيونى دەپ ايىپتادى. كومەكتەسۋگە، قامقور بولۋعا جان- جاقتى تىيىم سالىنعانىمەن، قازاق حالقى باسىنا ءىس تۇسكەن ادامداردى باۋىرىنا باستى.

«اشارشىلىق جىلدارىن وتكەرگەن حالىقتىڭ جاعدايى ناشار بولدى. سوعان قاراماستان ولار قۇرت، ءبىر ۋىس تارى اكەلدى. قىستاۋعا جايعاسقان قازاقتىڭ ءار وتباسى بىرنەشە ادامعا پانا بەرىپ، ءوز شاڭىراعىنا شاقىردى. ءبىر مەزەتتە ەكى وتباسىن باققان ادامدار دا بولدى. سوندىقتان «العىس ايتۋ كۇنىنىڭ» ءبىز ءۇشىن ماڭىزى مەن ءمانى زور. قازاقتىڭ جەرىنە كەلىپ، حالىقتىڭ قامقورلىعىنا بولەنگەن ءار ۇلت العىسىن ايتۋى كەرەك دەپ ەسەپتەيمىن. «كورەياعا قايتا ورالعىڭىز كەلمەي مە؟ » دەپ سۇرايدى. مەن - قازاقستان ازاماتىمىن. مەن وسى جەردە تۋىپ ءوستىم. تاريحي وتانىما بارىپ، تانىسقىم كەلەدى. ءبىراق مەن ول جاققا تۇبەگەيلى قونىستانىپ قالعىم كەلمەيدى. سەبەبى، قازاقستان - مەنىڭ وتانىم»، - دەدى يننا لي.

اۆتور: التىناي ساعىندىقوۆا