بەكبولات تىلەۋحان: مەنىڭ بالام الىپپەمەن قوشتاسا الماي كەلەدى

استانا. قازاقپارات - بۇگىن ماجىلىستە ورتا ءبىلىم ماسەلەلەرىنە ارنالعان وتىرىستا بەكبولات تىلەۋحان ق ر ءبىلىم جانە عىلىم ءمينيسترى ەرلان ساعاديەۆتى وقۋلىق ماسەلەسىن تالقىلاۋ ءۇشىن پارلامەنتكە شاقىردى، دەپ حابارلايدى قازاقپارات.

«بالالاردىڭ تاقىرىبىنا بۇرىلعان كەزدە، ۇلت پەن مەملەكەت ءۇشىن بۇدان ماڭىزدى ءىس جوق. شىن مانىندە، الىپپەدەگى قارىپ تانۋدى قابىلەتتى بالا 22-24 كۇندە ۇيرەنەدى، قابىلەتى جوق دەگەن بالا ارى كەتكەندە 60 كۇندە مەڭگەرەدى. ال مەنىڭ ءبىرىنشى سىنىپتا وقيتىن بالام بۇگىنگى 26 - اقپاندا ءالى «يۋ» ارپىندە ءجۇر. 7 اي وقىپ جاتقانىمەن، ارىپتەردى تولىق تانىماعان. بۇل قالاي؟ ونىڭ ۇستىنە بالادا ەشقانداي ەڭسەسىن كوتەرىپ، وينايتىن مۇمكىندىك جوق. تاڭەرتەڭ ساعات 8:30-دا كەتكەننەن، ۇيگە ساعات 17:00 كەزىندە كەلەدى. نە الىپ جاتقان ءبىلىم جوق، نە بالا بولىپ جۇگىرىپ، دەمالا المايدى. سونىمەن قاتار كۇرەسىنە، دومبىراسىنا جانە باسقا دا ۇيىرمەلەرىنە بارا المايدى»، - دەپ توقتالدى دەپۋتات ق ر  ب ع م وكىلدەرىنە قاراتىپ ايتقان سوزىندە.

وسى ورايدا ب. تىلەۋحان مەكتەپ باعدارلاماسى بالالارعا قيىن ءتۇسىپ جاتقانىن اتاپ ءوتتى.

 «بىلتىر وسى ماسەلەنى پارلامەنت قابىرعاسىندا ايتقانبىز. سول كەزدە مينيستردەن «وقۋلىقتارعا تىكەلەي كىم جاۋاپ بەرەدى؟» دەپ سۇراعاندا، ول ءوز كەزەگىندە مينيسترلىك جاۋاپتى ەكەنىن ايتقان ەدى. ءبىر الىپپەنى 7 اي بويى كەمىرىپ جاتىر جانە ونى ءالى تولىق وتكەن جوق»، - دەيدى ب. تىلەۋحان.

ءوز كەزەگىندە ءبىلىم جانە عىلىم ۆيتسە- ءمينيسترى اسحات ايماعامبەتوۆ ءوزىنىڭ دە بالاسى جاڭارتىلعان باعدارلاما بويىنشا ءبىلىم الىپ جاتقانىن ءسوز ەتتى.

«مەنىڭ بالام قازىر ەكىنشى سىنىپتا وقيدى. ءبىرىنشى سىنىپتا سول الىپپەنى وقىدى. بالا وقىعاندا اتا- انا رەتىندە ءوزىڭ دە سول كىتاپتى وقيسىڭ. سوندىقتان الدىڭعى جىلى الىپپەنى مەن دە بىرگە ءوتتىم. جاڭارتىلعان ءبىلىم مازمۇنى بويىنشا بالام اتالعان باعدارلامامەن ءتالىم الىپ جاتىر. وسى ورايدا سونشالىقتى قيىن بولدى، بۇگىن وقي المايدى دەپ ايتا المايمىن»، - دەدى ا. ايماعامبەتوۆ.

ءبىلىم ءمينيسترى ورىنباسارىنىڭ سوزىنە قاراعاندا، بالالاردىڭ ناۋرىزعا دەيىن الىپپەنى وقىپ جاتقانى تيپتىك باعدارلاماعا بايلانىستى.

بۇل جەردە بەكبولات تىلەۋحان ۆيتسە- ءمينيستردىڭ ءسوزىن ءبولىپ: «مەنىڭ بالام تەڭەرتەڭنەن كەشكە دەيىن مەكتەپتە. نەگە ءبىزدىڭ بالالارىمىز اكە- شەشەسىنىڭ باۋىرىندا بولمايدى؟ بالالار اتا- انانىڭ جىلۋىن كورۋى كەرەك قوي. كەڭەستىك كەزەڭدە 10- جەلتوقساندا «الىپپەمەن قوشتاسۋ» بولاتىن. 1973 -جىلدىڭ جەلتوقسانىندا بەكبولات تىلەۋحان الىپپەمەن قوشتاسقان. ال ناۋرىز تاياپ قالسا دا، مەنىڭ بالام ءالى «يۋ» ارپىندە ءجۇر. ەندەشە تيپتىك باعدارلاماڭىز قاتە. تيپتىك باعدارلاما وزگەرمەيتىن قاسيەتتى كىتاپ ەمەس. سوندىقتان ونى وزگەرتەيىك»، - دەدى.

وسى ورايدا دەپۋتات بۇل ماسەلەگە قاتىستى ق ر ءبىلىم جانە عىلىم ءمينيسترى ەرلان ساعاديەۆتىڭ ماجىلىسكە كەلۋى كەرەكتىگىن اتاپ ءوتتى.

«وسى ماسەلەگە ءمينيستردىڭ ءوزى كەلسىن. پارلامەنتتىڭ قابىرعاسىندا تالقىلايىق. تالقىلاۋعا تاجىريبە جۇزىندە جۇمىس ىستەپ جۇرگەن مۇعالىمدەردى، ياعني ءبىلىمنىڭ قامىن ويلاعان پەداگوگتاردى شاقىرايىن»، - دەپ تۇيىندەدى ءسوزىن بەكبولات تىلەۋحان.

 ەستەرىڭىزگە سالا كەتەيىك، 2017 -جىلدىڭ اقپانىن ماجىلىستەگى ۇكىمەت ساعاتىندا وقۋلىقتارداعى كەمشىلىكتەردى تالقىلاۋ ماسەلەسى بويىنشا دەپۋتات بەكبولات تىلەۋحان ق ر ءبىلىم جانە عىلىم ءمينيسترى ەرلان ساعاديەۆتى جەكپە- جەككە شاقىرعان بولاتىن.

اۆتور: رۋسلان عابباسوۆ