ناۋرىزدا كيىز ءۇيدى جاۋىپ الىپ، تاماق ىشكەندى قويۋ كەرەك - اكىم
قالا اكىمى مارات تاسماعامبەتوۆتىڭ ايتۋىنشا، بيىلعى ناۋرىز مەرەكەسى پەتروپاۆل قالاسىنىڭ ورتالىق الاڭىندا وتەدى.
جوسپارعا سايكەس 12 وتاۋدان تۇراتىن ەتنواۋىل، قولونەرشىلەر كورمەسى ۇيىمداستىرىلماق. مەرەكە قوناقتارىنا پالاۋ، باۋىرساق، ناۋرىز كوجە سىندى ۇلتتىق تاماقتار تەگىن بەرىلەدى. باعدارلامادا كونسەرتتەر، تەاترلاندىرىلعان قويىلىمدار جانە جاپپاي دومبىرا ويناۋ، قارا جورعا بيلەۋ سياقتى جوسپارلار بار. قازىر مەرەكەگە قىزۋ دايىندىق ءجۇرىپ جاتىر. بيلبوردتار مەن باننەرلەر دايىندالۋ ۇستىندە.
س ق و اكىمى قۇمار اقساقالوۆ مەرەكەدە ەشقانداي جابىق كيىز ءۇي بولماسىن دەگەن تاپسىرما بەردى. ايماق باسشىسىنىڭ پىكىرىنشە، مۇنداي جاعدايدا، حالىقتا كيىز ۇيلەر نەگە جابىق، ونىڭ ىشىندە كىمدەر تاماقتانادى دەگەن سۇراقتار پايدا بولادى.
«بارلىعى اشىق بولۋى كەرەك. كيىز ۇيلەر ۇلتتىق ناقىشتا بەزەندىرىلىپ، سالت-داستۇرلەرىمىزدى ايقىنداپ تۇرۋى ءتيىس. ەسىكتى جاۋىپ الىپ تاماق ءىشۋدىڭ قاجەتى جوق. ول جەردە كوپ بالالى انالار، ارداگەرلەر جانە مۇمكىندىگى شەكتەۋلى ادامدارعا تاماق بەرىلۋى ءتيىس. بىردە ءبىر كوشە جابىلماسىن»، - دەدى ق. اقساقالوۆ.
سونىمەن قاتار، وبلىس اكىمى شىعارماشىلىق ۇجىمدار ءوز اكىمدەرىمەن بىرگە جەرگىلىكتى جەردە بولۋى كەرەك ەكەندىگىن قاداپ ايتتى. وبلىس ورتالىعىنا كەلۋدىڭ ەش قاجەتى جوق.
«تاڭەرتەڭ قۇرىلعان كيىز ۇيلەر تۇستەن كەيىن اسىعىس جىعىلىپ جاتادى. مەرەكە ءبىر كۇندە ءبىتىپ قالمايدى. بارلىق وتاۋلار مەرەكە كۇندەرى تولىق اياقتالعانشا قۇرىلىپ تۇرۋى كەرەك»، - دەدى ءوڭىر باسشىسى.
