ءتۇن ورتاسىندا سەمەي كوشەسىندە جالعىز جۇرگەن بالا ۇيىنە ورالدى

None
None
سەمەي. قازاقپارات - جوعالعان 8 جاسار نۇرءالي مەللەت ۇيىنە ورالدى، دەپ حابارلايدى قازاقپارات.

اقپاننىڭ 24 نەن 25 نە قاراعان ءتۇنى اۋەزوۆ داڭعىلى بويىنداعى ساۋدا ۇيلەرىنىڭ ءبىرىنىڭ ماڭىنان تابىلعان بالا اۋەزوۆ پوليتسيا بولىمىنە تاپسىرىلعان بولاتىن. تۇڭگى ساعات 3 تە جالعىز ءوزى كوشە كەزىپ جۇرگەن بالانى نازىم ەسىمدى قالا تۇرعىنى كورگەن.

«جانىنا بارىپ، ەسىمىن سۇراعان ۋاقىتتا بالا قاشا جونەلدى. كۇن اياز بولدى. ەگەر ءبىر جەرگە وتىرىپ، ۇيىقتاپ قالسا ءۇسىپ قالادى. سوندىقتان سوڭىنان قالماي ءجۇرىپ وتىردىم. توقتاپ تۇرعان الەكساندر ەسىمدى كولىك جۇرگىزىشىسىنەن كومەك سۇرادىم. الەكساندر كولىكتە قالدى. ال مەن تاعى بالانى قورقىتىپ الماس ءۇشىن سەرۋەندەپ جۇرگەن كەيىپ تانىتىم. قاسىنا جەتكەن ۋاقىتتا تاعى قاشىپ كەتپەس ءۇشىن قولىنان ۇستاپ جىبەرمەدىم»، - دەيدى نازىم.

بالا الەكساندر مەن نازىمنىڭ ەشبىر سۇراعىنا جاۋاپ بەرمەگەن. سويتسە ەستۋ قابىلەتىنەن ايىرىلعان ەكەن. بىردەن ونى اۋەزوۆ پوليتسيا بولىمىنە تاپسىرادى. پوليتسيا قىزمەتكەرلەرى اتا-اناسىنا ىزدەۋ جاريالاپ، بالانى ۋاقىتشا بەيىمدەلۋ جانە كامەلەتكە تولماعانداردى ساۋىقتىرۋ ورتالىعىنا ورنالاستىرادى.

ءىستى قاراۋ بارىسىندا پوليتسيا ينسپەكتورلارىنىڭ ءبىرى، بىرنەشە اي بۇرىن ويىنشىق دۇكەندەرىنىڭ بىرىندە بولعان وقيعاعا قاتىسى بار بالا ەكەنىن ەسىنە تۇسىرەدى. ول كەزدە ول ويىنشىق ساتاتىن دۇكەنگە كىرىپ، ەش سەبەپسىز سورەدەگى ويىنشىقتاردى شاشقان. پوليتسيا قىزمەتكەرلەرى ەسكى ءىستى قاراپ، سوندا كورسەتىلگەن مەكەن- جايعا بارادى.

«مەكەن-جايى دۇرىس بولىپ شىقتى. بالانىڭ اتا-اناسى دا كەشتەن باستاپ ىزدەپ جاتقاندارىن جەتكىزدى. ءبىراق پوليتسياعا حابار بەرمەگەن. بۇل وقيعا ءبىرىنشى رەت ەمەس ەكەن. ەگەر بالا جوعالسا، بىردەن قۇقىق قورعاۋ ورگاندارىنا حابار بەرۋ كەرەك. قازىر بالانىڭ جاعدايى جاقسى، ۇيىندە. انا-اناسى تابىلعان بويدا بارىپ الىپ كەتتى»، - دەيدى جەرگىلىكتى پوليتسيا قىزمەتى باسشىسىنىڭ ورىنباسارى ادىلبەك نىعمانوۆ.

شىنار عالىمبەك قىزى

 

 

  

سوڭعى جاڭالىقتار