سابيلەردى سۋرەتكە ءتۇسىرۋ ونەرى قالاي دامىپ كەلەدى؟ - فوتو

قوستاناي. قازاقپارات - ەلىمىزدە وتباسىلىق فوتو ءتۇسىرىلىمنىڭ جاڭا باعىتى - NewBorn-فوتو ەندى- ەندى دامىپ كەلەدى.

اتالعان فوتوونەردىڭ قىر-سىرى تۋرالى «قازاقپارات» ح ا ا ءتىلشىسى قوستانايلىق فوتوسۋرەتشى ديانا تاعايەۆادان سۇراپ كوردى.

NewBorn - جاڭا تۋعان نارەستەلەردى فوتوعا ءتۇسىرۋ ونەرى. بۇل باعىت قازاقستاندا ءالى دامۋ ۇستىندە. جاڭا عاسىر باسىندا NewBorn-فوتوعا قارسىلىق تانىتقاندار كوپ بولدى. مۇنى حالىقتىڭ ءدىني كوزقاراستارى جانە دىلىمەن بايلانىستىردى. ال، شەتەلدە مۇنداي فوتوسەسسيا جاساۋ ۇيرەنشىكتى جۇمىسقا اينالعان. قازىر ەلىمىزدە ءتۇسىرىلىمنىڭ بۇل ءتۇرىن قولداۋشىلار سانى ارتقان. وسى باعىتتا جۇمىس ىستەيتىن فوتوسۋرەتشىلەر دە قاتارعا قوسىلدى.

- NewBorn-فوتو باعىتىنا قالاي كەلدىڭىز؟

- مەن ءبىرىنشى قىزىمدى 2014 -جىلى دۇنيەگە اكەلدىم. بارلىق جاس وتباسىلار سياقتى مەن دە ءوز ءسابيىمنىڭ قىلىقتارىن تاسپاعا ءتۇسىرىپ الۋدى ۇناتاتىنمىن. كەيىن مۇنىم قىزىعۋشىلىققا اينالىپ، حوببيعا ۇلاستى. مىنە، 2015 -جىلدان باستاپ بۇل فوتوونەرمەن تۇراقتى اينالىسىپ كەلەمىن. فوتوسۋرەتشىلەردىڭ ارنايى كۋرسىنان ءوتتىم. ءبىراز ۋاقىتتان سوڭ فوتوارلەۋشى سىنىبىن اياقتادىم. سول جىلى ت م د ەلدەرىنە تانىمال newborn-فوتوسۋرەتشىدەن ءدارىس الدىم. وسىدان كەيىن ءوز ءومىرىمدى NewBorn-فوتو باعىتىنا ارنادىم دەسەم قاتەلەسپەيمىن.

- العاشقى فوتو ءتۇسىرىلىم قالاي ءوتتى؟

- فوتو ءتۇسىرىلىمدى ەندى باستاپ جۇرگەندەر ءۇشىن ءبىرىنشى سىناقتىڭ قوبالجۋلى بولاتىنى انىق. ءسابي ءوزىن قالاي ۇستايدى؟ اناسى قالاي قابىلدايدى؟ مىنە، جۇمىستىڭ ساپالى ناتيجەسى وسىلارعا بايلانىستى. اۋەلى ءوز تۋىستارىمدى ءتۇسىرىپ كوردىم. مەنىڭ ءبىرىنشى كەيىپكەرىم ءوزىمنىڭ جيەنىم بولدى. ءتۇسىرىلىم ءساتتى ءوتتى دەپ ويلايمىن.

- سابيلەرمەن جۇمىس ىستەۋ قانشالىقتى قيىن؟

- مەنىڭشە، NewBorn - فوتو ءتۇسىرىلىمنىڭ ەڭ قيىن ءتۇرى. بىرىنشىدەن، ءسابيدىڭ كوڭىلىن وزىڭە قاراتۋىڭ كەرەك. ونىڭ قاۋىپسىزدىگى ۇنەمى نازاردا بولادى. ەكىنشىدەن، سەنىڭ جۇمىسىڭدى ءسابيدىڭ اتا-اناسى قاداعالاپ تۇرادى. سوندىقتان فوتوسۋرەتشى ءسابيدىڭ عانا ەمەس، انا جۇرەگىنە دە جول تابا ءبىلۋى ءتيىس. كوبى مەنەن بۇل باعىتتى نەلىكتەن تاڭداعىنىمدى سۇرايدى. فوتوگرافيا - بۇل ونەر، ال سابيلەردى فوتوعا ءتۇسىرۋ - ونەردىڭ بيىك شىڭى. سەبەبى، مۇنداي ءفوتوتۇسىرىلىم ءبىر-اق رەت جاسالىپ، ماڭگىلىك ەستەلىك رەتىندە ساقتالادى.

- كىشكەنتاي مودەلدەردى قاي جاسىنان باستاپ فوتوعا تۇسىرگەن دۇرىس؟

- مۇنداي ءتۇسىرىلىم سابيگە ەكى اپتا تولعاننان باستالادى. ويتكەنى، بۇل ارالىقتا نارەستەنىڭ كىندىگى اجىرايدى. وسىدان سوڭ بالانىڭ ءار ءتۇرلى قالىپتاعى ساتتەرىن وبەكتيۆپەن «ۇستاپ الۋعا» بولادى. اۋەسقوي فوتودان گورى، كوركەم فوتو ءتۇسىرىلىم جاساۋعا مۇمكىندىك الاسىڭ.

- NewBorn-فوتوعا دايىندالۋ ءۇشىن جاس اتا- انالارعا قانداي كەڭەس بەرەسىز؟

- جالپى، قوستانايلىق قاۋىم مۇنداي ءفوتوتۇسىرىلىمدى ءالى تولىقتاي قابىلداعان جوق. كوبىسى سابيلەرىنە 40 كۇن تولماعانشا كاسىبي فوتوعا تۇسىرتپەيدى. ءبىراق، سوڭعى جىلدارى NewBorn-فوتو باعىتىن قولداۋشىلار كوبەيىپ كەلەدى. فوتوسۋرەتشى ارىپتەستەرىمىزبەن ءتۇسىرىلىم ءۇشىن بىرگە تۇراقتى باعانى بەلگىلەدىك. قوستانايدا 5000 تەڭگەگە NewBorn-فوتو جاساۋعا بولادى. كەي اتا-انالاردىڭ زاماناۋي كوزقاراستارى قۋانتادى. بالانىڭ كىشكەنتاي كەزىندەگى قىلىقتارىن ەستە قالدىرۋ ءۇشىن دە NewBorn-فوتو باعىتىن تاڭدادىق. ءبىزدى قولدايتىندارعا العىسىمىز شەكسىز.

اۋدارما: قاسقىرباي قويشىمانوۆ